NONGPOH:
Haba kren sha ki lad pathai khubor ha ka 20 tarik Nohprah, kata hadien ka jingwan kynduh ïa u Deputy Commissioner ka Ri Bhoi, ki nongïalam ka Synjuk ki Rangbah Shnong Ri Bhoi District (SRSRBD) ki la pynrem bad ther kylla halor ka jingïakhih da ki paid na ka Jaidbynriew Garo hapoh ka shatri jong ka All Ri Bhoi Garo Headman Association, kiba la mih shakhmat lyngba ka jingïalang paidbah ha Rangsakona, ban dawa na ka Hima Mylliem bad KHADC, ba ki dei ban weng noh ïa ka jingbthah jong ki sha u DC bad kaba ka bthah ba sha u DC ba ym dei ban pdiang ïa ki No Objection Certificate (NOC) ne ki Dulir jaka, kaba pynshisha da ki Rangbah Shnong Garo.
U Bah PB Sylliang, uba dei u General Secretary ka SRSRBD, u la ong ba ka synjuk ka pynrem jur halor katei ka jingdawa da kitei ki paid Garo, ha kaba u la kren shai ruh ba katkum ka Myllien Act jong u snem 2007, ka la kren shai ba ki Garo kin dei beit tang ki nongpynïaid shnong, hynrei kim lah ban ai ïa kino kino ki NOC ne ki Dulir jaka, ha kaba tang uno uno uba dei u rangbah shnong Khasi, uba lah ban leh ïa kata.
Shuh shuh, ula ong ruh ba ha ka jinglap jong katei ka Synjuk, ba kumba ka long mynta, ba ki paralok Garo ki la thombor bad leh Rangbah shnong jubor, ha kaba ki la ai NOC ne Dulir pathar sha kiba bun bad kaba la pynlong ba bun na ki jaka na ka jylla, ki la leit lut sha ka jylla Assam.
Ha kawei pat ka liang, na ka liang ka Synjuk ka pynrem jur halor ka jingthaw ïa kawei ka kynhun kaba la tip kum ka All Ri Bhoi Garo Headman Association, ha kaba na ka liang ka Synjuk ki Rangbah Shnong Ri Bhoi, kim ithuh ïa kata ka Synjuk bad ha kajuh ruh ka por, ki la dawa ba ki dei ban pynduh pyndam noh mardor ïa katei ka kynhun.
“Kumba ka long mynta wat hapoh Garo Hills, ki don shibun ki paraloh Khasi jong ngi, kiba la poi shongkha bad ki Garo, hynrei haduh mynta ym pat don kiba la mih shakhmat, na ka bynta ban tuklar ïa ki kam shnong thaw ne ban ïakhun ïa kata ka kam nongïalam shnong, namar ki burom ïa ki riti synshar khadar Garo” ong u Bah PB Sylliang.
Namarkata, na ka liang ka Synjuk ka kyntu ïa ki paid Garo ba ki dei ban ïa burom markylliang bad ha kajuh ruh ka por, ki dawa na u DC ka Ri Bhoi, ba u dei ban pynskhem ïa katei ka jingbtah na ka Hima Mylliem bad kata ka long ba ym dei ban pdiang ïa ki NOC ne ïa ki Dulir jaka kaba la soi la saiñ da ki Garo, namar ha ka jingshisha hi ka long ba ki Garo ki lah ban long tang kum ki nongpeit nongkhmieh ïa ka shnong, hynrei ym ba kin long kum kita ki Rangbah Shnong, u la bynrap.
