NONGPOH:
Haba shimkhia halor ka jingujor na ki nongtrei kontraktor ha Ri Bhoi, kiba la ujor sha ka seng, namar ba ki la shah leh shilliang palat ha ka bhah kam ne ka rukom ïoh jingtrei ha ki tnat treikam bapher bapher ha Ri Bhoi, ki nongïalam ka Federation of Khasi Jaintia & Garo People (FKJGP) Ri Bhoi, mynta ka sngi ki la ther tyngeh ïa ki Myntri bad kumjuh ruh ïa ki MLA, kiba la donkti ha kum katei ka kam beaiñ.
U Bah Shanlang Diengdoh, General Secretary ka FKJGP Ri Bhoi lem bad u Bah Gabriel Sun, Education Secretary, ki la pynpaw ïa ka jingsngewkhia kaba jur eh halor katei ka jingujor na kitei ki kontraktor, namar ki sngewthuh ba kito kiba ïoh ïa ki jingpyntrei, kan dei beit tang ïa kito kiba don ïa ka jingïadei bad ki Myntri ne MLA, hynrei ki bym don jingïadei, kaba mut ba kim ïoh ïa kino kino ki kam, wat haba ki tnat sorkar ki la pyllait ïa kino kino ki tender.
Kitei ki nongïalam ka FKJGP, ki la ong ruh ba kumba ka long mynta, ka seng ka sngewthuh ba kino kino ki Tender kiba la pynmih ha ki tnat treikam sorkar, kata naduh ha ka tnat Water Resources, PWD, PHE lem bad kiwei, ka la shu long tang dep, hynrei ha ka jingshisha hi ka long kaba la shu leh pyndep rukom, namar ki kontraktor ki bym don ka jingïadei ne ithuh ïa ki heh ki haiñ, kaba mut ba kim ïoh kam na ka bynta ban pyntrei, namar baroh la bat lut da ki briew jong ki Myntri bad MLA.
Haba ïadei bad katei ka jingujor da kitei ki kontraktor ha Ri Bhoi, ka seng ka la rai ban buddien ban tip ïa ka jingshisha bad lada kin lap ba katei ka jingkynnoh da ki kontraktor kam dei kaba shisha, kaba mut ba ka seng kan sa shim da ki sienjam kiba tyngeh.
