MAWKYRWAT:
Ka jingneh jong u lapbah ha ka thain jong ka South West Khasi Hills ka long kaei kaei kaba i sangsot ban peit bad ïohi ba ki surok ha kylleng ki jaka ki la sdang ban jot rathai la ka long ha ki por tlang bad khamtam eh haba wan ka lyiur namar na ka jinglynshop jong u slap bad na ka jingbym biang ki nala ne ki nur um ha kaba ka um bunsien la sakhi ba ka ju tuid ym na ki nur hynrei na ka surok
Ka wei naki surok ha ka shnong Marshillong la sakhie ïa ka jingjot rathai jong ki surok na ka liang ki paidbah nongshong shnong, ki nongñiahkali bad kiba ju pyndonkam ha ka leit ka wan na kine ki surok kaba dei ïaid na ïew Mawkyrwat sha Marshilong bad Nongbah-Marshilong bad kaba dei ruh lynti ban poi sha Jashiar na ka liang jong ki ki la pynpaw ka jingsngewdiaw shikatdei eh namar ka jingsniew palat jong ka surok kaba la dap sa tang da ki khoh-roh khoh-ram ha kane ka jing slap kaba la neh da ki taïew.
Ha dien ba ka ïoh sngew naki katto katne ki paidbah ba ki la ud la nam halor ki jing sniew ki surok ba ka jingsniew jong katei ka surok ka la ktah shibun eh ïa ka ïaid ka ïeng ym banse ba lyngba kane ka khubor kan long ka lad ban pynsngew sha ki bor ba peit ba kin leh ei ei lem halor kane ka surok namar ka la long kaba sniew.
Namar kata ki katto katne ki paidbah ki la buh ka jingkyrpad ïa u nongmiihkhmat jong ka Mawkyrwat Constituency ba un sngewbha ban shimkhia lem halor kane ka mat da kaba thaw ki lad ki lynti ban pynbha noh ïa kane ka surok bad um dei kular tang ha ka por shwa ka elekshon namar bunsien la ju ïoh ba ki jingkular ha ka por elekshon ki long ki long ki bun hynrei ban pyntreikam pat ki long tang khyndiat.
