SHILLONG:
Ka jingbym biang ki Nala kala pynthud ïa ka leit ka wan jong ki paidbah ha bun ki bynta jong ka Nongbah Shillong.
Ka jingther u lap bah ha ka janmiet jong ka 31 tarik Lber kala paw pen ryngkew ïa ka jingbym biang jong ki Nala ha bun ki bynta jong ka Nongbah Shillong, ka jingbym biang ki Nala ban pyntuid ïa ka um bad ka jing bym biang ka plan haba ki shna ïa ka surok ka ktah shibun ïa ki ha ki por ba jur u slap.
Na ka liang U Nongthoh khubor u la ïoh ba ka Polo ka la dap smam da ka um ha surok baroh ka wei kaba la pynsyrtok ïa ki paidbah nongleit nongwanbad wat ki kali ruh ki Shem jingeh ban ïaid na ka daw ba la tap lut ïa ka surok da ka um. Ha baroh shi lynter jong ka surok ka ban leit Sha Lawmali la ïohi ba ki jaboh jabaiñ ki la per sha sla um kaba pynisait met ïa ki paidbah.
Lada phai pat sha ka wei ka bynta kaba ha pdeng jong ka Nongbah Shillong katta ha Lower Lachumiere, la ïoh na ka Surok kaba don ha khmat jong ka DIPR ka la dap smam da ka um kaba la buh jingeh ïa ki paidbah ban ïaod sha shiliang jong ka surok namar jong ka jingshlei um.
Ka daw jong ka jingshlei um ha surok ka dei beit ba ka nala kam biang, bad ki don ruh ki bynta kiba ka Nala ban pyntuid um ka rit bha na ka daw jong ka jingbym peit bniah ha ka por ba ki shna ia ka surok.
Lada kum kine ki jingshlei um ki jia na ka por sha ka por, ka jingkylli ka mih hato ki bor ba dei peit Kim ïohi ïa kane ka jingeh jong ki paidbah? Hato kin shu peit kai ïa kane? Hato kim don ki lad ki lynti ban pynbha bad ban wat ki lad ki lynti ba ha kine ki bnai ki ban wan kum kine kin ym jia shuh?
Ka la dei ka por ba ki paidbah ha ryngkat ki nongshong shnong kiba mat ia kum kine ki jingeh ba kin mih sha khmat ban dawa na ka sorkar ba kan phai khmat bad ban leh eiei ban pynbha bad pynheh ïa ki Nala ban lait na kum kine ki jingjia hadien habud.
Ka la mih ka jingkylli, ba lada u slap uba dang hap tang da ki minit, ka la wanrah ka jingshlei um haduh katne, kan jia aiu lada wan u slap ba neh bun sngi ne bun kynta.
