SHILLONG:
U Myntri ka tnad Social Welfare, u Bah Paul Lyngdoh, ha ka 15 tarik Jylliew u la khot ïa ka jingïalang bad ki nongïalam jong ki kynhun niam bapher bapher ha ka jylla ban ïakren bad ïatai halor ka jingkynrei jong u drok ha ka jylla.
Ha ka kren sha kilad pathai khubor u Bah Paul u la ong ba ha kane ka jingïalang la shim ïa ka jingai jingmut ban lah ban tehlakam ïa ka jingsaphriang u drok ha ka jylla bad la shim ruh ai ka rai ban pynlong ïa ki kynja ai jingïasyllok (counselling) bad ki jingai jingpynshai (awareness programmes) ha kylleng kylleng ban pynsngewthuh halor kane ka jingma.
U Myntri ka tnad Social Welfare, u la ïathuh ba na ka liang ka sorkar kan sa mang T10 Klur, na ka bynta ban ïakhun pyrshah ïa ka jingsniew jong u drok, ha ka jylla da ki lad ki lynti kiba kan sa shim, ban ai bynta lang ïa baroh ki briew ki ba donbynta lang kum ki kmie ki kpa, ki nongpynïaid skhul, ki nongïalam ha ki kynhun niam bapher bapher bad ki seng treimon sngewbha.
Da ka jingithuh ïa ki 7 tylli ki district, ba jur tam ka jingkhaii bad jingdih drok, u Bah Paul u la ong, “Kane ka pisa ka ba la mang da ka sorkar kan long na ka bynta kine ki district. Mynta ka sngi ngi la ïoh ban pynlong ïa ka jingïalang bad ki nongïalam ki kynhun niam bapher bapher ha ka jylla ban pan ka jingïatreilang na ki namar ba ki, ki don ïa ki jingtei, kumta nga la bthah ba kin wanrah da ka jingtyrwa na ka liang jong ki khnang ba kin lah ban pynurlong noh ïa kane ka project”.
Kane ka mang tyngka kan long na ka bynta baroh ki District, sha ki sengbhalang, bad baroh ki kynhun ki ba la dep ban pynithuh ïalade ba kin ïakhun pyrshah ïa u drok ha ka jylla.
Haba kylli halor ki sienjam ba la shim da ka sorkar ban pynthikan ïa ka jingpyntreikam hok ïa kane ka pisa da kine ki kynhun u Myntri u la ong ba ka tnad ka don da ka system ban peitngor ïa ka jingpyndonkam hok ïa kane ka pisa kan long na ka bynta ka thong ba la buh.
“Ngi don ïa ka mission director, ka development associates drawn na ka planning department. Bad baroh ki jingpynlut yn sa khmih ba kan dei ka jingpyndonkam hok,” u la ong.
U Bah Paul u la ïathuh ruh ba ki nongïalam jong ki kynhun niam bapher bapher kin sa don ïa ka jingïalang ha ka 19 tarik u Jylliew ban ïatai halor kane ka bynta bad kin sa wanrah biang ïa ka rai bad ka jingai jingmut jong ki sha ka Sorkar halor kane ka project.
Haba kylli u la ong, “Ki kynhun niam bap her bapher ki don ka bynta ba khraw bah ha ka jylla, bad lada ngi sdang ban ïalap paidbah halor ka jingmlien ban dih drok bad kumno ban don ka jingkitkhlieh ban rat diengkhong ïa kane ka jingsniew kan long ka sienjam ka ba khraw na ka bynta ka lawei jong ka jylla Meghalaya.”
