NONGPOH:
Ki nongshongshnong ka Umroi Nongrah kaba don ha Ri Bhoi District ki la pynpaw ïa ka jingsngewkhia kaba khraw halor ka jingleh donbor u Rangbah Shnong, u Bah Baiateilang Lapang, namar u la thmu ban die ïa ka nan jong ka shnong khlem ka jingtip lang jong ki.
Ki katto katne ngut ki nongshongshnong ki la kynnoh ba kane ka jingjia ka la poi sha ka jingïakhih kaba khluit bha, haba ki la buh ïa ki jingthoh ban pynbna ban ym die ïa kane ka nan khlem ka jingpynjur ka Dorbar lane ki nongshongshnong.
Kane ka kynrum kynram ka la sdang haba la saphriang ki khubor ba u Bah Lapang u la die ïa ka nan khlem ïaphylliew jingmut bad ka Executive Committee jong ka Dorbar Shnong.
U Bah P Dkhar, Rangbahshnong barim ka Nongrah u la maham ïa ki nongthied ba kane ka nan ka dei ka mar nongkynti ki paidbah bad ki nongshongshnong kin ym shah satia ban die da lei lei ruh.
Ki nongshongshnong ki la ujor ruh ia u Bah Lapang uba pyrshang ban die ïa ka nan khlem jingmynjur ne jingtip ka Dorbar Shnong.
Ki la pynrem ruh ïa ki jingleh jong u, da kaba kdew ba kane ka nan ka dei ka tyllong ba kongsan ka shnong bad ym dei ban die duh na ka bynta ban ïoh myntoi shimet.
