NONGSTOIÑ:
U Myntri ka tnat Social Welfare ka jylla, u Bah Paul Lyngdoh ha ka 6 tarik Naitung, u la wan jngoh ïa ka Nongstoiñ ha kaba la synran ïa u da u Deputy Commissioner ka West Khasi Hills District, u Bah Garod L.S.N Dykes, ka Director ka tnat Social Welfare, ka Kong C D. Lyngwa, u Superintendent of Police jong ka District, u B.D Marak nalor kiwei pat ki heh sorkar jong ka district.
Ïa kane ka jingïalang la pynlong hapoh Vanni Hall, St. Peter’s Higher Secondary School, Pyndengrei, Nongstoiñ bad la wan ïashim bynta da ki nongtrei anganwadi, ki khynnah na ki Shelter Homes, ki NGO bad kiwei kiwei.
Haba ai jingkren ha kane ka jingïalang, u Myntri ka tnat Social Welfare, u Bah Paul Lyngdoh, u la ai ka jingïaroh halor ka jingtrei shitom jong baroh ki nongtrei ka tnat Social Welfare kaba kynthup naduh ki ophisar haduh ki nongtrei anganwadi kiba la trei shitom na ka bynta ka bha ka miat jong ka imlang ka sahlang hapoh ka district bad ka jylla hi baroh kawei bad u la kyntu ruh ïa ki nongtrei ka tnad Social welfare jongka West Khasi Hills ba ki dei ban trei ïa ka kam ba la bynshet ha phi kum kita ki missionary ym kum ki mercenary.
Haba kren halor ka jingpynrung kytreng Aadhaar hapoh ka distrik, u Bah Paul Lyngdoh u la ai khublei ïa ki bor pynïaid distrik na ka bynta ka jingtreishitom ban pynsngewthuh paidbah kum shibynta ban kyntiew shuhshuh ïa ka jingpynrung kyrteng Adhaar ha West Khasi Hills Distrik bad u la kyntu ïa ki nongshongshnong ki bym pat shym la pynrung kyrteng ba kin leh kumta na ka bynta ban ïoh ïa ki jingmyntoi bapher bapher na ka sorkar pdeng bad ka sorkar jylla.
Ha ka jingkren jong u myntri, u la ban jur halor ka jingdonkam jong ka jingtreilang jong baroh ban wanrah ïa ka suk ka shngaiñ hapoh ka imlang sahlang khamtam ha kine ki sngi ha kaba ki kam dih bad khaii drok hapoh ka jylla kila nang jyllei.
Haba kren halor ka jingpyndonkam ïa ka rynsan social media, u myntri u la kyntu ïa ki paidbah ba kidei ban pyndonkam ïa kane ka rynsan kum ka rynsan ban tei ïa ka imlang sahlang bad ban ym pyndonkam bakla ïaka.
Kiwei kiwei pat kiba la kren ha kane ka sngi ki kynthup ïa u Deputy Commissioner ka West Khasi Hills District,u Bah Garod L.S.N Dykes, ka Director ka tnat Social Welfare, ka Kong C. D. Lyngwa, ka District Programme Officer, ICDS Cell, West Khasi Hills, ka Kong V.C War bad ka Child Development Project Officer, ka Kong B. Rynjah kaba la ai ïa ka jingkren ai khublei.
