SHILLONG:
Hapdeng ka jingiphuh iphieng jong ki riewngeit ka Balang Katholik, ha ka 13 tarik Naiwieng, ki la wan ban shim bynta ha ka Proseshon Eukharist Bakhuid ha Cathedral, Laitumkhrah.
Ha kane ka sngi la sakhi ïa ka jingwantuid da ki phew hajar ngut ki paidriewngeit jong ka Balang Katholik, na baroh ki Parish ka jylla kiba la wan shim bynta ha kane ka jingleh niam kaba ju pynlong shisien ha ka shisnem.
Lah ban kdew hangne ba ka Balang Katholik, ka khlem ïoh ban pynlong ïa ka “Proseshon Eukharist ” ha kine ki 2 snem ki ba la dep, na ka jingwan lyngshop ka khlam COVID 19, hynrei mynta u snem hapdeng ka jingphuh jingphieng bad ka jingriewblei la ïoh ban pynlong ïa kane ka Proseshon Eukharist 2022.
La pynlong ïa ka jingkñia mass ha ka por mynstep da u Most Rev. Archbishop, u Victor Lyngdoh ryngkat ka jingïadonlang ki Phadar ki sister,ki nongtrei balang bad ki paid riewngeit.
Ha kane ka sngi bakhuid, u Most Rev. Archbishop Victor Lyngdoh, u la ong ba ka tyllong bad ka thymmei jong ka Balang Katholik la khana ha ka maïa Paskha, ka jingim, ka jingshah shitom ,ka jingshah ïap bad ka jingmih pat jong u Jisu Khrist.
“Ka la pynwan ha ka Eukharist bakhuid ha kaba ngim dei ba ngi shu kynmaw hynrei ka urlong biang shisha shisha ba u Khrist u im, u shah shitom, u shah ïap bad u mih pat, u kdiah ïalade ban pynim ïa ngi baroh”, u la bynrap. Ha ka janmiet la pynlong ïa ka jingïaid Proseshon Eukhrist kaba la sdang naduh ka phyllaw jong ka ïingmane bah bad pynkut ha Calvary, kaba la bud da ka jingpynlong ïa ka jingmane ïa u Eukharist bakhuid shwa ba u Archbishop un rah ban leit buh hapoh ka ïingmane bah.
Ha kane ka sngi la wan ban shimbynta lang u Myntri rangbah ka jylla u Conrad K Sangma, ka MLA kane ka thain ka kong Ampareen Lyngdoh , u bah Sanbor Shullai, u bah R V Lyngdoh ,Frantin M Lakdong bad kiwei kiwei.
Ïa ka Eucharistic Procession, la sdang ha ka por mynstep da ka jingpynbynta ïa ka Mass Bakhuid da u Archbishop Victor Lyngdoh ryngkat bad ki paid ‘riewngeit jong ka Balang Katholik, ym tang na Meghalaya, hynrei na kylleng ki jylla jong ka thaiñ shatei lam mihngi. Ha kane ka jingpynlong ïa ka jingkñia ïa ka Mass Bakhuid, la ïa shim bynta ruh da kiwei ki lyngdoh. Ha kane ka kñia, la ïoh ban pdiang ïa ki jingtyrwa na ki paid ‘riewngeit, kiba long ka dak ka shin jong ka jingsngewnguh ïa u Blei uba la kyrkhu shibun eh ïa ki.
Haba pynkynmaw ia u Pope Francis uba la buh ïa ka Sngi U Blei, ka 13 tarik u Naiwieng kum ka sngi ba kynmaw ïa kiba duk barngli, ban ieid bad ban ïarap ruh ia ki. U Archbishop u la pynkynmaw ki Khristan kiba nyngkong ki la long ka nongmuna jong kane da ka jingïarap markylliang hapdeng jong ki.
U la ong ba dei na kane ka daw ban ym baduk hapdeng ki khristan banyngkong. Nangta u Archbishop u la pynkynmaw ïa ki paid ‘riew ngeit ïa ka jingkren jong U Trai Jisu shaphang ka jingpynpra ïa ka Temple. Da kaba ring jingmut na kane, u la ong ba kiei kiei jong kane ka pyrthei, kiba don ka jingsdang kan poi ka por ban kin kut noh bad ba ki paid ‘riew ngeit ki dei ban tieng ïa kata, namarba U Trai Jisu hi u la hikai ba ym dei ban tieng bad kata ka thong jong ki bangeit ka long na ka bynta kiei kiei kiba kynja mynsiem bad kiba iaineh junom.
