MAWKYRWAT:
Ka jingjur palat jong u slap ha ka miet jong ka 13 tarik Jylliew ka wanrah ka jingjulor ka wei ka ïing Skul jong ka Khlur Rit Government Lower Primary School, Mawpud, South West Khasi Hills District sa shisien pat ka la mad biang ïa ka jingshah pynjulor ha ka mariang ha kaba mynta ka kynti ka ïing shet ja jong ka Kong Jopcy Wanniang baroh kawei ka la twa bad hap ha katei ka skul haduh ba ka kynroh skul bad ki tin ïing skul ki la pra naka jingjia ha kane ka jingjur u slap.
Katkum ki tyllong khubor ba la ïoh lum na ki nong shongshnong , la ïathuh ba katei ka jingjia ka la jia mynnin ka miet 14 tarik por 1:30 AM eiei. La ïathuh ruh ba na ka daw ba lajan ka Exam shiteng snem, ki bor pynïaid skul kim banse ban pan da ka ïing jong ka Anganwadi Centre bad kamra na ki ïing briew ba marjan na ka bynta ban pynlong skul ne ban ïoh ban thoh Exam ha kine ki sngi ban wan.
La ïathuh ruh ba kane kadei ka sien ba-ar ba kane ka skul ka la mad ïa ka jingshah pynjot ha ka mariang, bad kaba nyngkong ka jia ha u snem 2019 ha kaba ka kynroh ïing jong katei ka Kong Jopcy hi ka la twa bad pynjot ïa katei ka skul. La ong ba ki bor pynïaid skul ki la dep pyntip ha ka ophis BDO, BADO bad kumjuh ruh u MLA, Bah Pius Marwein, hynrei haduh mynta ka kynti la wan hap sa ïing shet ja ryngkat ka khyndew ha katei ka skul kim shem la lah ban leh eiei halor kane ka bynta.
Ha kawei pat ka jingjia kaba la jia ha kajuh hi ka miet ha shnong Mawpud ha ka por kumba 1 baje eiei mynmiet, ka la don ka jingshah tap khyndew jong ka ïing Kong Bala Ryntathiang namar ka jingjur palat jong u slap bad ha kane ka jingjia donbok ka kmie ukpa bad ka khun ki la lait im salit
Nalor ki jingjulorki ïing kala don ruh ka jingshah rong noh haka umsaw ïa ka wei ka surok subway kaba don ha ka shnong Kensohsan Ranikor Block kaba long ka lynti ban leit sha Nongjri ka la dkut noh hadien ba la shah rong ha ka um slap ,bad kane ka jingkieng shipor ( subway) ka dei ba la shna da ka wei ka Kompani ïa ka National Highway ba ki nang pyntrei mynta ïa kane ka surok kumba long mynta ki kali kiba dei ban ïaid lyngba kane ka surok ki la sahkut lut baroh.
Halor kine ki jingjia ym shem don mano mano ki briew kiba mynsaw hynrei tang ki jingjulor ki ïing bad ka surok.
