SHILLONG:
Ka jingjur slap ha kylleng ka jylla ka la wanrah ïa ka jingshlei um ha ki bynta jong ka nongbah Shillong bad ka jingtwa khyndew ha kiwei pat ki bynta kiba don shabar na ka nongbah Shillong.
Ha kawei na kum kine ki jingjia twa khyndew, ka la don ka jingpynthud ïa ka leit ka wan jong ki kali ha National Highway NH-06 hapoh East Jaintia Hills, hadien ba la don ka jingtuid ka khyndew ktieh ha Sunapur tunnel, kaba la pynsah kut lut ïa ka leit ka wan jong kiba bun ki kali.
Ki bor ba dei peit ki la don ha kane ka jaka ban pynkhuid ïa kane ka ktieh kaba la tuid na u lum uba don ha syndah jong kane ka tunnel, kaba la tuid namar ka jingjur palat u slap kaba la jia naduh ka por 5 baje mynstep.
Haduh ba thoh ïa kane ka khubor, kim pat lah ban pynkhuid ïa kane ka ktieh bad ka jingleit jingwan jong ki kali lyngba kane ka jaka ka dang sahkut lut.
Lah ban pynkynmaw ba ha ka 27 tarik Jymmang ha ka por mynstep, ka don kaba kum kane ka jingjia kaba jia ha kane ka juh ka jaka kaba wanrah ïa ka jingthud jong ka leit ka wan ki kali da ki kynta.
Kane ka surok ka dei kaba bunkam bha ka leit ka wan ki kali, namar ka pynïasoh ïa ka Barak Valley, Mizoram bad Tripura bad ka Meghalaya bad Assam.
