MAWKYRWAT:
U MLA/MDC jong ka Ranikor Constituency, Bah Pius Marweiñ, u la buh ïa u maw nongrim na ka bynta ban pyntrei ïa ka skhim umbam umdih na ka Jal Jeevan Mission (JJM) kaba la tip kum ka Nongjri-Nonghyllam Combined Water Supply Schemes (N-NCWSS) kaba ha ka jingmang kaba T. 8.94 klur.
Kane ka skhim kan pynïoh um ha ki san tylli ki shnong kata ka Nongjri, Nonghyllam, Poitbli, Nongumsur bad Rajaju bad ba kynthup ïa ki 444 tylli ki longiing.
U Bah Pius u la ong ba hadien ka jingap khmih lynti da ki phew snem jong ki paidbah jong ki 5 tylli ki shnong kiba don haduh 444 tylli ki longïing ka la urlong mynta ka sngi lyngba jingplie ïa u maw nongrim ba T. 8.94 klur tam lyngba ka ophis jong ka Public Health Engineering (PHE).
U la ong ruh ba kumba ka Sorkar India ka la buh ïa ka thong ba ha u snem 2024 kan pynpoi um bam umdih ha baroh ki longïing bad ki nongshong shnong jong ka Ri India kaba kynthup ruh ïa ka jylla Meghalaya. U la ong ba ha kine ki bnai bad ki snem ki ban sa wan, shibun ki shnong kin ïoh ban pynpoi um haduh ki tyndong iing jong ki lyngba ka JJM bad kiba dang trei shait shait nangne shakhmat kan sa long ka jingmyntoi bad kan pynsuk ïa shibun ki paidbah nongshong shnong hapoh ka jylla hi baroh kawei.
“Ngi sngewthuh shai ba khlem ka um lada ki don kyrhai ka spah kam myntoi ei ei namar ba ka um ka dei kaba kordor tam ha ka jingim jong ngi”, la ong u Bah Pius.
Ha ka jingïalang ba la pynïad u Bah S. Najiar u Executive Engineer ka PHE Mawkyrwat, la ïoh ka jingkren na u Bah B.B. Shylla, Secretary ka Shnong Nongjri bad na u Bah Listen Marweiñ kiba dkhot jong ka Nongjri-Nonghyllam Combined Water Supply Schemes, u Bah L.G.M. Kharmih, SDO ka Ranikor Civil Sub Division.
La pynshongshit ka jingrwai kyrpang na ka samla Lapdiang Nongsiej.
