SHILLONG:
U Myntri ki kam pynroi sor ka Meghalaya, u Bah Paul Lyngdoh ha ka 13 tarik Jylliew u la ong ba ka jinglong khynnah hapoh ka khyndai snem ka rta, ka long kaba kongsan haduh katta katta ha ka jingim jong u briew. U Bah Paul Lyngdoh ula ong ba ka jinglong jong u khynnah ha katei ka por ka ïasyriem ïa ka dewbyrtha kaba lah ban pynwandur ha kano kano ka rukom. U Bah Paul Lyngdoh u la kyntu ïa ki nonghikai ba dei ban ai lut ïa ki jinghikai babha baroh ïa u khynnah ha katei ka por kaba biang, khnang ban yn lah ban saindur ïa u ha ka rukom kaba dei.
U Bah Paul uba long u Kongsan bad u nongplie ïa ka jingïaphylliew jingmut halor ka National Policy on Education ba la pyllong da ka Sankar Dev College, Shillong, ka la ïoh ruh ïa ki jingkyrshan na kiwei ki tnad trei kam, u la ong shuh shuh ba ïa u khynnah lah ban saindur kat kum ka jingkwah jong ngi. Hynrei, ka long pat kaba ban saindur ïa u briew ynda u la rangbah. “Bun na ngi kiba la rangbah ki jingïaleh pyrshah, hynrei kam long pat kumta na ka bynta jong u khynnah”, la ong u Bah Paul Lyngdoh.
Ha kane ka jingïaphylliew jngmut kaba ïa dei bad ka jingpyntrei kam thymmai ïa ka thoh ka pule ha India, ïa kaba la tip kum ka Naional Education Policy-2020, ba la ïa don lang ki nonghikai jong ka College kynthup ruh ïa ki samla pule, u Bah Paul Lyngdoh u la ïathuh ba ka Meghalaya ka la long shisien ka pneh jong ka Dong Shatei Lam Mihngi ha kaba ïa dei bad ka jingai ïa ka thoh ka pule bad ïa ka jingnang jingstad.
U la ïathuh ruh ba ka Meghalaya ka la pynmih ïa ki ‘riewstad, ki ‘riewshemphang bad kyntu ïa kitei kiba la ïa don lang ha katei ka sngi ban pynlong biang sa shisien ïa ka Meghalaya ka jaka kaba ai ïa ka thoh ka pule bad ïa ka jingnang jingstad kaba bha tam ha ri India.
U Bah Paul Lyngdoh ula ïathuh ba dang shen u la u la wan jngoh ïa ka dewbah Europe bad ha kata ka jingleit jngoh jong u ïa ka Dewbah Europe, u la sngewlyngngoh bad ïa kynduh ïa ki saïantis jong ki ha Europe kiba dei ba Meghalaya. U Bah Paul Lyngdoh ula ïathuh ba u nong shem ïa ka Automated Teller Machine, kaba baroh baroh ngi ïa rah ha ki pla, u John Adrian Shepherd-Barron, u dei uwei na Meghalaya bad la kha ïa u ha Dr. H. Gordon Robets Hospital ha Jaiaw, Shillong.
