SHILLONG:
Ki paidbah ki la wan tuid na kylleng ka ri Khasi Jaintia ban ai ka jingkyrshan ia u Bah Ardent Miller Basaiawmoit, President ka Voice of the People Party (VPP) uba shah thngan halor ka mat ban pynbeit noh ia ka Reservation Policy.
Mynta ka sngi, ki la don ruh ki paidbah kiba wan na ka thain Pynursla, kaba dei ka konstitwensi jong symbud myntri rangbah ka jylla, u Bah Prestone Tynsong, uba dei ruh u Vice President ka seng National People’s Party (NPP).
Haba kren halor ka jingkuman jong u Bah Prestone ban kren halor kane ka bhah thungkam thungjam, uwei u rangbah uba dei na ka shnong Mawshun, haba iakren bad ki nongthoh khubor u la ong ba u Prestone u kular tang ha shwa ka ilekshon, hynrei tang shu dep ilekshon um ju leh ei ei.
“U Bah Prestone u la ong ‘kyrshan ia nga, tang shu jop ngan leh ia kane’, hynrei um leh ei ei”, la ong une u rangbah da kaba kdew ruh ba wat ia ka Pynursla CHC ban kyntiew kyrdan noh sha ka Hospital um leh eiei.
“Ia ka Civil Sub-Division kaba lah dei ban plie naduh mynno, hynrei dang mynta u snem u dang sdang pyntrei”, la ong shuh shuh une u rangbah.
“Nga kyrkieh namar nga hap leit sha Nongpoh ban plie ia ka kam bad um sngap shi kyntien ruh”, la ong u rangbah.
Une u rangbah u la pynrem ruh ia ka sorkar MDA da kaba kdew ba ka wan tang shisien san snem ban kular ban leh ei ei hynrei mynta halor kane ka mat kaba ktah ia ki khun samla ka sngap man man.
“Wat lada ngi dei ban iap ngin ialeh pyrshah, la ka dei da ka suloi ka wait”, la ong shuh shuh une u rangbah.
