SHILLONG:
Ka seng Hynniewtrep National Liberation Council (HNLC) ka pynpaw ïa ka jingbitar halor ka jingleh mradkhlaw ki pulit Assam kiba lah siat pathar khlem jingisynei ïa ki Khasi ha Block-1.
Ha ka kyrwoh u bah Sainkupar Nongtraw u General secretary-cum-Publicity secretary, ka seng u la ong ba kane kam dei ka sien ba nyngkong ba ka Sorkar Assam kan thombor bad siat pynïap ïa ki briew ha khappud bad ka daw tynrai baroh ka dei namar ba ka Sorkar Meghalaya ka long kaba tlot.
Ha ka jaka ba ka Sorkar India kam don mon ne kam lah ban weng ïa ki jingeh ka jylla Meghalaya halor u pud u sam, ka sorkar Meghalaya ka dei ban sngewthuh ban leh la kajong ka kamram, da ka sngewthuh ba duna ha ki bor pulit, ka lah dei ban pynrung kam pulit ïa ki riew paidbah kumba pynrung kam shipai ha kiwei ki ri khnang ban wanrah ïa ka jingshongsuk shongshngain khamtam ha khappud lym kumta yn sa long kum ki nong Palestine ban shu kylla phetwir kha ma kha ha la ka jong ka ri.
Ka jingkam ka sorkar Assam ba ka Mukroh ka hap hapoh ka West Karbi Anglong ka pyni shai kdar ba kane ka jingjia ka dei ka kam kaba ki lah pynkhreh bha khnang ba ki paidbah kito ki thain kin sheptieng bad rung noh sha Assam haka kylla kaba ar haka jingpynbeit pud ki 2tylli ki Jylla.
Ka Jylla Meghalaya ka lah ïoh ïa ka ïing kaba khlem u pud u sam, bad ka jingmynthi ka Sorkar kmie ban pynbeit ïa u pud u sam ka lah wanrah pynban ïa ka jingïaumsnam ym tang ha Meghalaya hynrei ha kylleng ka thain shatei lam mihngi. Kane imat ka lah dei lypa ka kam ïalehkai ha ka sain hima ka sorkar kmie khnang ban pyntlot bad ban khanglad ïaka jingïatylli ha kine ki Jylla ha Northeast.
Ka seng ka la ong ruh ba ka mat ban ïoh ïa ka jingithuh na bynta ka ïing lajong bad u pud u sam ba tikna ka bri u Hynniewtrep ka dei ka jingdawa kaba hakhmat eh jong ka HNLC. “Ngi kyrmen ba kane ka jingïakren ïasuk bad ka Sorkar kan long kaba seisoh khnang ba ngin lah noh ban weng ïaka jingeh ka Jaidbynriew”, la ong ka kyrwoh ka seng.
Ka la bynrap ba lada jia ba kane ka jingïakren kam biang, ka jingïaleh jong ka HNLC kan dang ïai bteng wat lada kan shimpor sa 35 tylli ki snem. “Lada ka jingsuk ka mut ba ngi hap ban kbum ïala ka shyntur ha ka saw ka sian, ngim kwah ïa kata. Lada ka jingsuk ka mut ba ngi hap ban shu ieng pdeng halor ka jingleh bym hok ïa kata ruh ngim kwah namar ka jingsuk kiba dang im ka pher na ka jingsuk kiba lah ïap”, la ong ka HNLC.
