SHILLONG:
U slap u ba la hap ha ka 9 tarik Jylliew u la kham neh bun kynta bad u la wanrah ka jingkmen ïa ki nongshong shnong namar ba u la wanrah ka jingkmen ïa kiba bun ki nongshong shnong kiba la ap khmih lynti ïa u slap.
Ha kine ki ar bnai mynshwa, ka bneng ka la long ka ba shit kyrang bad pynlynga ïa baroh ki nongshong shnong, khamtam ki nongrep namar ba la dei ka por ba kin rep kin riang.
Hynrei u slap u ba la hap mynta ka sngi u la neh tang da ki kynta, bad pynshlei um lut ïa ki lynti ki syngkien, bad kine ki dei na ka daw ka jingbym biang ki nala ki ba la pynlong ba ka um kan lang ha ki surok bad pynthud ïa ka leit ka wan ki nonsghong shnong.
Watla kum kine ki jingshlei um, kim dei shuh kiba dang thymmai ïa ki nongshong shnong, kham tam ha ki thaiñ Langkyrding, Nongmensong bad ka Pynthor namar ka ju ïai jia bad kane ka dei na ka jingbym biang ki nala um ki ba pynlong ba tang shu slap tang da ki kynta kine ki jaka ki la ngat ïa ka jingshlei um ka ba shyrkhei.
Kawei ka jaka ka ba la kylla kum, ka pung ha ki kynta bat her u slap ka dei ka Lower Lachumiere, bad kane ruh ka dei ka jaka ba ka um ka ju lang tang shu hap u slap na ka daw bym biang ki nala ban ïaid ka um.
Da ka jinghap u slap mynta ka sngi ka la don ka jingtuid shait shait ha ki wah khamtam ïa ka wah ka ba don hapdeng sor ka Wahumkhrah ka ba la kiew bad noh sha ki bynta jong ka wah Umiam.
Kumba ka long hi mynta ka jylla, ka jylla ka don hapdeng ka jingap kmang ban ïoh ïa u slap, hynrei khamtam ka ba kham donkam ka long ruh ban weng ïa ka jingkhuslai jong ki ba bun balang haba ki peit ïa ka jingring swai ka Wah Umiam, ka ba dei ka shnat ban pynmih bording elektrik ha ka jylla.
