SHILLONG:
Uwei u jait jingthung uba ju ïoh tang ha ka Bri u Hynñiewtrep, u dei uba ki khot soh, bad ym dei u soh hapoh u dieng hynrei u soh hapoh ka khyndew. Uta u dei u soh uba shngiam bha haba bam lang bad u nei. Hangne ngi kren halor u “Sohphlang”.
Ka kynhun jong u Kynjatshai, mynta ka kynti, ka la hiar sha kawei ka dong Laitkroh jong ka shnong Umtyngngar East Khasi Hills District, ban sakhi bad wad bniah halor ka rep Sohphlang ha kaba ka la ïashem ïa ka Kong Diamon Khriam, kaba rep bad die sohphlang.
Ka Kong Diamon Khriam ka dei ka longkmie kaba rep hi ïa u sohphlang ha Laitkroh, Umtyngngar, bad ka ju pynïaid ïew ruh ïa u sohphlang ha dukan ba ka shong harud ka surok; arlad ban leit sha Laitlyngkot bad Sohra. Ha ka jingïakren bad u Kynjatshai, ka Kong Diamon ka la ïathuh halor ka rep Sohphlang.
U Sohphlang u dei u jait jingthung uba man bha ha ki thaiñ Nongthliew, Smit, Umtyngngar bad ha kiwei kiwei ki jaka. Ki ju thung ïa u Sohphlang ha u bnai Lber bad kan shim por haduh 7 bnai ei ei ba u sohphlang un met bha kata haduh u bnai Risaw.
La jied ïa u sohphlang ban long symbai da ki sohphlang kiba rit, namar u sohphlang uba heh ym lah ban seisoh bad ym lah ban pynmih bun. Ki nongrep ki ju buh hi ïa u symbai lane ki thied ïa u symbai ha ka dor T.100-T.120 tyngka shi kilo.
Haba peit ïa ka rukom rep ïa u Sohphlang, ka ïasyrïem bad ka rep phan namar ba la tep ïa une u jait jingthung hapoh ka khyndew, kumba rep phan. Ïa u sohphlang ruh ki ju tih ïa ka thliew bad tep ïa u sohphlang hapoh ka kyndew ha ryngkat ka sboh eit masi ne eit sniang bad ka sboh ba thang ïa ki ñuit, ki ñier na ki lyngkha. Une u jait jingthung u dei uba donkam tang ïa u slap uba hap katkum ka aïom.
U sla jong u sohphlang u long rong jyrngam bad rit kum u sla jatira bad ki nongrep ki ju ap haduh ba une u sla un kylla rong bthuh; kin sa sdang ban tih bad sei noh ïa u na ka khyndew. Ka rukom tih bad sei ïa u sohphlang na ka khyndew ka long kumba khlong phan na lum bad u snoh ha u thied kumba snoh u phan bad haba la sei shabar ka khyndew, u long rong stem u snep jong u.
Lah ban kdew hangne ba u snep sohphlang u long satbyrsia, haba bam bad don ba ong ba u long kum u dawai wieh. Haba poi sha ka bynta ban pynibang bad pynitynnad ïa u sohphlang kum ha ïew ha hat, ba un long ha ka ronglieh, ka long shisha ka bynta kaba kham jynjar, namar ka donkam ka por bad ka bor shibun.
Na ka rong stem sha ka ronglieh, ka long lyngba ka jingsait ïa u ha ka wah kaba rit bad ban sait ïa u sohphlang donkam da ka bormet ki rangbah briew. Ki sait ïa u sohphlang da kaba buh ïa u phlang ha madan, bad tynrong ïa ka shang ba don u sohphlang, nangta sa theh da u shyiap lieh bad ïuh shilliang ka kjat ba yn ym pra bad sa kynruh ïa ka shang suki suki haduh ba u sohphlang, na ka rong stem un kylla sha ka ronglieh bad kane ka dei ka bynta kaba donkam bun tam ka por bad ka bor.
Hadien kane yn bud sa ban sait sa ha ka um bad sa phriang ïa u sohphlang ha ka sla ban ot ïa ki snep kiba khlem khuid. Ha ka por ba la sait ïa u da u shyiap, bud sa ka sait sa arsien bad sa pdem ïa une u Sohphlang haduh ban da dei ka por ban rah noh ïa u sha ïew sha hat.
Ka jingrep ïa u sohphlang ka dei kaba suk hynrei ka jingshimpor ba un heh ka long kaba shimpor palat bad ki nongrep ki ïoh ban rep tang shisien ha ka shisnem. U bam por bad bor bha haba sait ïa u bad don ki snem ruh ba u ju ïap tram lane u shah pynduh noh na ka daw ka jingshah bam ha ki khnai lum lane ki risang.
Haba kylli na ka Kong Diamon halor kano kano ka jingïarap na ka liang sorkar ha kaba ïadei bad ka rep Sohphlang, ka la ong, “Haduh mynta ka jingrep Sohphlang ka dang long tang ka kam shimet jong ki nongrep bad na ka liang ka sorkar kam pat phai khmat sha kane ka liang.” Ki nongrep ki sngewtynnad ban rep ïa une u jait jingthung wat la u dei uba jynjar tam. Ha ki bynta shuwa ba un poi sha ïew, sha hat, une u jait jingthung u dei uba lah ban pynïoh kamai bha ïa ki nongrep bad ki ju sngewtynnad ruh ban rep bad die hi ïa u Sohphlang namar u kham lahdor.
