SHILLONG:
U MLA ka Jaïaw konstitwensi uba dei ruh u nongïalam barim jong ka Khasi Students Union (KSU) ha ka jingkynmaw burom ïa ka lyngkhuh sngi ïap ba 160 snem jong u Woh Kiang Nangbah, u la kyntu ïa ki dkhot ka KSU bad ka jaidbynriew baroh kawei ba lada ki kwah ban long nongïalam na bynta u paid ka ri kidei ban long shuwa kiba nang kiba stad kiba pule ïa ki aiñ ki kanun bad kiba tip ïa ka jinglong jingman jong ka jaidbynriew khnang ba kin long kiba bit ban mih khmat.
U la ong ba da ka jingsngewkhia jingmut u kyntu ïa kane khnang ba ka jaidbynriew kan nym ïap ei, u la ai nuksa ba u tyllai phasi ïa u Woh Kiang Nangbah ka long na bynta ka jaidbynriew hynrei lada ym kyndit bynriew ban pyrkhat thymmai u tyllai phasi u ap ïa ka jaidbynriew hi baroh kawei.
U la bynrap ba ka jingeh kaba ki khun samla ki ïakynduh ka long ba ki don kiba shu nang tang ban pyrkhat khlem da leh eiei katba ki don ruh kiba leh khlem da pyrkhat, kumta u la kyntu ïa ki dkhot ka seng ba kin long kiba pyndonkam bha ïa ka jingstad ban don ïa ka jingpyrkhat na kiba bun ki liang.
