SHILLONG:
Ka KSU Laban Circle ha ka 5 tarik Jylliew ka la leit ujor bad pynkynmaw sa shisien halor ka jingsahteng ban weng ïa ki bar jylla ba ri masi beaiñ ha Maxwelton Estate bad ha Lower Lumparing. Na ka liang ka Seng, ka pynpaw ïa ka jingbitar halor ka jingslem ki bor pynïaid ban weng ïa kine ki bar jylla.
Katkum ka kyrwoh ba la phah da ka seng, la ïathuh ba kine ki bar jylli kiba ri ïa ki masi kim don ki kot ki sla kiba biang bad ruh ha ka jaka ba hap ha Municipal kaba ymlah ban ri jingri bad kaba kham ma ka long ba ki pyntuid jaboh sha ki wah kaba lah ban ktah ïa ka koit ka khiah ki paidbah.
“Ka jingdon jong kine ki bar jylla ha kine ki jaka ka pynjaboh ïa ka mariang namar ki pyntuid ïa ka jaboh sha ki nala bad sha ka wah. Bad ka jingsma ba mih na kane ka jaka ka don jingma ïa ka koit ka khiah jong ki paidbah”, la ong ka kyrwoh na ka seng.
Ka Seng ka la maham ruh ba lada ki bor pynïaid ki dang ïai pynslem ban weng ïa kine ki bar jylla, ka Seng kan shim hi ïa la ki jong ki sienjam ban weng ïa kine ki bar jylla kiba pynjaboh ïa ka mariang. Ka seng ka la pynpaw ruh ba kam kwah ba ka Maxwelton Estate kan long sa kum “Them Metor ba ar” namar kat nang ïaid ki sngi nang bun ki bar jylla kiba nang wan buhai shnong beaiñ.
Na ka liang ka Shillong Municipal Board ka la pynshai ba ka la dep leit khmih ïa kitei ka jaka bad shen hi kin sa phah noh da ka Order ban weng noh ïa kine briew ba ri masi beaiñ ha kine ki jaka.
