SHILLONG, 23 Lber (KJS):
U MLA bad MDC jong ka Mawhati konstitwensi, u Bah Charles Marngar, ha ka 23 tarik Lber u la wan ban buh da ka dorkhas ha khmat u Chief Executive Member (CEM) ka Khasi Hills Autonomous District Council (KHADC) u Bah Titosstarwell Chyne, ban kyntu ban phah pynsangeh mardor ïa ka jinglehmon ki briew ka Karbi Anglong Autonomous Council (KAAC) lyngba ka tnat Khlaw.
Haba kren sha ki lad pathai khubor, u Bah Charles u la ïathuh ba ka jingïakynduh jong u bad u CEM ka KHADC ka long ban pynsngew ïa ka jingmad jingeh ki nongrep synsar ha ki shnong ki ba don ha ka thaiñ block-II ki ba hap mad ïa ka jingthom bor na ki briew ka tnad khlaw jong ka Karbi Anglong Autonomous Council, ki ba la lum ïa ka khajna beaiñ na kine ki nongrep.
“Ka KAAC, ka la buh ïa ki briew jong ka kiba dei briew shimet ki balum khajna ha ki san tylli ki kyrdop ki ba ki la pynïeng khnang ban lum pisa na ki nongrep synsar, ki ba ki la buh ha ka Shnong Jatalong, ha Madan umwang, ha Sabuda, ha Umlaper bad kawei ha ka shnong Mawsaladiang”, u la ong.
U la bynsrap shuh shuh, “Ka jingkrong ïa ka khajna ka la long ka ba palat namar ba ki oh ïa ka dor kaba heh ryngkat ka jingai ïa ka rusit kaba ki thoh ki ong Jharu mahaldar, ka mut ki dei ki kyrdop kiba buh kyrpang tang ban khrong na ka bynta u Synsar”.
“Kane ka jingkrong khajna beaiñ jong ki nong Assam ka la ktah shibun ïa ki nongrep kiba don ha kine ki thaiñ ha ka ba ki ju khrong 8 tyngka shi kilo, u synsar bad shikali pickup ki nongrep ki la hap ban siew T.15,000 sha ki briew ka Assam”, u la ong.
U Bah Charles u la kyntu ïa u CEM ba u dei ban shim khia halor kane ka bynta bad ban ïarap ïa ki nongrep kiba shnong ha kine ki jaka.
“Kane ka jinglum khajna ka la sdang naduh ba la sdang ban die ïa u synsar, kata u bnai Lber bad kat ba dang mih ki sngi ka jingkhrong khajna ka dang pyrkhing bha.
U la ïathuh ba u CEM ka KHADC u Bah Titosstarwell u la kular ban phah mardor da ka jingthoh sha u CEM ka KAAC, bad ha kajuh ka por ka tnat Forest jong ka District Council ruh kan hiar ban jurip bad ban tuklar ïa kane ka jingleh jong ka KAADC.
U la bynrap, “Kane ka jingleh jong ka KAAC ka pynpaw ba ka Assam kam kheiñ snep ïa ka sorkar jylla Meghalaya bad ka pynpaw ïa ka jingleh donbor ïa ki briew kiba sah sha ki thaiñ khappud”.
