NONGSTOIÑ:
Ka jingdawa bad ka jingangnud ki paidbah ka thaiñ Lai Lyngdoh ban kyntiew kyrdan noh ïa ka Nongkynjang Sub Centre sha ka Primary Health Centre kaba la sahteng da ki bun phew snem kala wan ban urlong noh ha ka 13 tarik Kyllalyngkot hadien ba u MLA ka Nongstoiñ u la ïoh ban buh ïa u Mawnongrim ban kyntiew kyrdan noh ïa katei ka Sub Centre.
Haba ai jingkren kum u kongsan ha katei ka jingïalang plie Mawnongrim u MLA ka Nongstoiñ, u Bah Macmillan Byrsat u la ong ba lada ngi phaidien ban peit ïa ki jinglum jingtip (records) hapoh ki tnad sorkar hapoh secretariat ngi lap ba katei ka jingdawa kala sahteng la palat 20 snem.
Shuh shuh u la ong ruh ba kham mynshwa kala don kawei kaiphod hapoh secretariat kaba ong ba ban kyntiew kyrdan ïa ka Nongkynjang Sub Centre kam pat long da kaba ki ong ym pat idonkam namar ba lada shna ïa ka surok Nongstoiñ sha Kynroh tang 5 minit ki paidbah kila lah ban poi sha Nongstoiñ.
Kumta u la ong ba kum u Nongmihkhmat u la shimkhia ban buddien ïa katei ka kam namar ha ka kam synshar khadar don ar tylli ki mat kiba kongsan ba lah ban weng ïa ki jingeh bad kata kadei kata kadei ka jingjop da ka jingstad bad ka jingjop jong ka bor kaba la pynkup da ki paidbah.
“Ha ka 23 tarik Nohprah 2022, nga la ong ïa u Commissioner Secretary jong ka Planning bad Finance ba nga kwah ban plie noh ïa u Mawnongrim ban kyntiew kyrdan noh ïa ka Nongkynjang Sub Centre sha ka PHC bad 11 tarik mynta u bnai ka sorkar kala mang pisa haduh 9 klur 78 lak bad shen yn sa khot tender noh ban shna ïa kane” ong u MLA.
Ym tang kata na ka liang jong u MLA u la ong ba un sa pyrshang ban buddien bad ban shimkhia ban pynïoh ïa u briew u ba lah ban pyndep 10 bnai ban pyntrei ïa katei ka PHC ka ban ai jingshakri ïa 21 tylli ki shnong jong ka thaiñ Lai Lyngdoh.
