SHILLONG:
U nongïalam ka liang pyrshah hapoh ka ingdorbar thawaiñ ka jylla u Dr Mukul Sangma, u la ther tyngeh ïa u Myntri Rangbha ka jylla Meghalaya u Conrad K Sangma bad ïa u Myntri rangbah ka jylla Assam u Himanta Biswa Sarma, halor ka jingbym nang ban pynïaid ïa ka jylla ha kum kine ki por ba huri hura.
Haba kren bad ki lad pathai khubor mynta ka sngi, u Dr. Mukul Sangma u la ong ba ki Myntri rangbah jong kine ki ar jylla kim nang ban pynïaid ïa ka jylla ha kum kine ki por, ha kaba ka sorkar Meghalaya ka pynbeit ïa kane ka por huri hura da kaba khang ïa ki internet katba ka sorkar Assam ka khang ïa ki nongleit nongwan ban wan sha ka jylla.
“Hato ka dei kane ka lad ka lynti ba kine ki ar ngut ki myntri rangbah ki shim ïa ka sienjam ban pynbeit ïa kane ka jinglong jingman kumba ka long mynta?”, u la kylli. “Ngi dei ki briew kiba don ka jingkit khlieh, ngi dei ban long kiba peitngor bad ha kum kine ki jingjia balei ka donkam ïa ka sorkar ba kan pynduh ïa ka hok jong u paidbah ban pyndonkam ïa ka hok ban tip ïa ka jingshisha da kaba khang ïa ka internet”, u la ong.
“Nga ruh nga la ïoh ïa ka lad ban long kum u myntri rangbah, bad nga la ïoh ban bat ïa u lakam shynshar, hynrei ngam ju pynbeit ïa ki jingeh da ka ba pynduh ïa ki nongshong shnong ïa ka hok jong ki”, u la bynrap.
U la ong ba ka internet ka dei kaba donkam tam ha ka por mynta, bad ka la long ka bynta jong ka jingim jong baroh ki nongshong shnong hynrei kane ka sorkar kam don jingtip kumno ban pynïaid ïa ka jinglong jingman bad ka jingleh kumne ka long pynsniew shuh ïa ka jinglong jingman. “Ka jinglah jong ka sorkar ban pynïapher halor ki nongpynkhein aiñ bad ki nongshong shnong kiba bud ïa ka aiñ ka dei ka jingkitkhlieh jong ka sorkar, bad tang namar ba ki katto katne ngut ki briew kiba pynkhein ïa ka aiñ, kan ktah pat ïa ki ba kohnguh ïa ka aiñ”, u la bynrap.
“Kane kam dei ka lad ka lynti ban tem ïa kum kine ki jinglong jingman bad ban pynduh ïa ka hok ki nongshong shnong bad nga dawa ba ka sorkar ka dei ban plie noh mardor ïa ki internet”, u la ong.
U Mukul u la ther tyngeh ruh ïa ka sorkar Assam, kaba la pynmih ïa ka jingbthah ïa ki nongleit nongwan ban ym leit sha Meghalaya. “Hato ki khlem ïakren baroh ar liang ban pynthikna ba kan ym don kano kano ka jingpynkhein ïa ka aiñ. Ngam ïohi kano kano ka jingïatrei lang hapdeng ki ar jylla, ki wad lad ban pynbha ïa ka jinglong jingman da kaba khang ïa ka internet da kaba khang ïa ki briew ban rung sha ka jylla Meghalaya”, u la ong.
U nongïalam ka TMC u la ong ba dei ban pynneh ïa ka shong suk shnong shngaiñ kaba dei ka jingkitkhlieh jong ki ar jylla, bad u la pynrem ïa ki jingleh jong ki sorkar kaban wanrah ïa ka khubor kaban ïalam ba kla ïa ka jylla.
