SHILLONG:
U nongwad RTI bad uba dei ruh u vice-president jong ka ACHIK, u la leit buh da ka RTI ha ka Directorate of Employment and Craftsmen Training,Meghalaya halor ka rukom thungkam ha kane ka tnad treikam.
Ha ka jingpynlait khubor, u Greneth M Sangma uba dei u nongleit wad RTI u la buh jingkylli halor ka jingthung ïa ki san ngut ki bymdei ki Garo ha ka Government ITI Tura.
U la ong ba ha kane ka jingthungkam, la ïaid lait katkum ka kyndon jong ka Meghalaya Job Reservation Policy, 1972 namar ki don bun ki nong ai jinghikai ki bymdei Garo kiba la shah thung watla ki don bun ki Garo kiba la bit ban trei ha kane ka kam.
U la ong ba ka ACHIK ka sngewkhia ruh hadien ba ka tip ba kum kine ki jaitkam ki dang lait ha kiba bun ki bynta jong ka Rilum Khasi.
U la buh jingkylli ruh halor kane ka jingthung da ki briew ki bymdei ki Garo. “Kaei ka daw ba ki kam ba lait hapoh Rilum Garo la pyndap da ki briew bymdei Garo da kaba knieh noh ïa ka pliang ja jong ki Garo kiba trei ha kane kajuh ka tnad treikam kumba 4-7 snem kum ki nongtrei contract”, u la buh jingkylli.
Ha kane ka jingpyllait khubor u la ong ruh ba ha ka jingshisha ïa kine ki kam ba lait mynshwa la bat da ki Garo, la ka dei permanent ne tang kum ki nongtrei contract. Pynban ha ka jaka ba kin pyndap da ki Garo ki pyndap da ki bymdei ki Garo.
La ong ruh ba ka ACHIK kan lum kan lang ïa ki jingtip halor kane ka mat kumjuh ruh ïa kiwei pat ki mat kum ka jingpyntreikam bad jingpynlut ïa ki klur tyngka ba la bei da ka Asian Development Bank ha kane ka tnad.
