SHILLONG:
Ka Sorkar Meghalaya kaba la trei borbah ryngkat bad ka Sorkar Manipur haduh mynta ka la lah ban wanrah sha Meghalaya ïa ki samla pule kiba na kane ka jylla haduh 83 ngut kiba pule ha Manipur. Ïa kane la ïathuh da u Myntri Rangbah ka Meghalaya, u Conrad K. Sangma ha ka jingpathai khubor jong u sha ki lad pathai khubor bad nongthoh kot khubor .
U Myntri Rangbah Conrad K. Sangma u la ïathuh ba ka Sorkar kan sa lah ban wanrah lut ia u samla pule jong ka Meghalaya kiba pule ha ki jaka pule bapher bapher jong ka Manipur hadeng ka 47 bad 72 kynta. Ki khubor Sorkar ki iathuh ba don kumba 200 ngut ki samla pule kiba ka Meghalaya kiba pule ha Manipur kiba dang sahkut ha katei ka jylla. Ka Sorkar jylla ka la pyrshang ban iarap ia ki kmie ki kpa jong kito ki samla pule kiba dang don ki khun kiba dang sahkut ha Manipur ba ki lah ban pyndonkam ki Helpline No. 1800-345-3644 ha kaba ki lah ban ioh ia ki jingtip kiba iadei bad ki khun jong ki bad ia ka jinglong jingman ha Manipur.
Ha kawei pat ka liang, ki samla pule jong ka Meghalaya kiba don ha Manipur ka lah ban pynsngew ia ki jingeh jong ki ha u Nodal Officer u Bah Remdor Dkhar (+91 98631 14387) bad Dr Paul Chyne (9863089972) na ka bynta ba ioh jingtip bad ban lah ruh ban ai jingiarap ia ki.
