SHILLONG:
Watla ka jylla ka la pynïeng ïa ka khyrdop Entry-Exit Point ha Umling Ri-Bhoi ban talasi ïa ka rung ka mih jong ki mynder hynrei kaba sngew lyngngoh ka long ba la lap jan 30 ngut ki bar jylla kiba la wan poiwir ha nongbah Shillong ha ka step jong ka 14 tarik Nohprah, bad kiba la wanrah ryngkat ki khun ki kti ban wan da ka jingthmu ban shong ban sah bad ban kamai kajih hangne bad ki la ïalum lang ha Umshyrpi, Rilbong.
Haba kylli, ki la ong ba ki wan na jylla Rajasthan ban wan die ïa kata ka kot kaba ki khot ka Magic Book bad haba bniah ki la ong ba ki dei hi ki briew kiba ïaid kylleng jong ka Ri ban leit die ïa kata ka kot bad ki la ong ba ki la shang ha kylleng ka Northeast India bad ha ki khep ki khep ki sah miet da ki taïew. La sakhi ba kiba wan baroh ki dei tang ki riew kynthei ryngkat ki song ba la kit ïa ki jaiñ ki nep bad ki khiew shet khiew tiew.
Ka Khasi Students Union (KSU) Upper Shillong bad Mawprem Circle hadien ba ka la ïoh jingtip ïa kane, ki la pyntip marmar sha ki pulit bad kin shimkhia ban pynphai noh ïa ki.
Haba kren sha ki lad pathai khubor, u President ka seng Bah Shngaiñlang Sohkhlet u la takraiñ tyngeh ïa ki bor talasi bad ïa ki bor ba dei khmih ïa ka rung ka mih jong ki mynder da kaba buh jingkylli ha ka jinglyngngoh, “kumno kat jan 30 ngut ki ïoh rung beit wut wut khlem don mano mano ba khang, shaei ki jah kita ki nongtalasi” la ong u Bah Shngaiñlang Sohkhlet.
U la ong ba kane ka pynpaw ïa ka jingtlot jong ki bor ba dei khmih. “Ngi dap da ka jingsngewkhia ka mynsiem ban ïohi ïa ka jingtlot jong ka sorkar, naduh na Umling kim shym lah ban shimkhia ïa kane bad ban shu ailad ïa ki briew kiba na bar ban shu wan buhai shnong hangne ha shnong jong ngi”, u la ong.
U la ong ba ynda ka seng ka la pyrshang ban kylli, kine ki briew kim don wat ïa ki kot ki sla kiba biang bad kim batai shai ki wan ban leh aïu ha nongbah Shillong.
