SHILLONG:
Da ki hajar ngut ki samla pule, ha ka 30 tarik Jymmang ki la wan ban shim bynta ha ka jingïaid paidbah ka ba la pynlong da ka Education Cell ka Hynñiewtrep Youth Council (HYC) ka ba la ai kyrteng da ka ‘Hynñiewtrep Youth March’, kum shibynta ban pynpaw ka jingkyrshan ba pura ïa u Bah Ardent Miller Basaiawmoit u President ka Voice of the People Party (VPP) u ba dang don hapdeng ka jingshah thngan ban pynbor ïa ka sorkar ban pynbeit ïa ka reservation policy ha ka jylla.
Haba kren bad u General Secretary ka HYC u Bah Roy Kupar Synrem u la ong ba ka HYC, lyngba ka Education Cell, ka la pynbeit ïa ka ne ka sngi ban pynlong ïa ka jingïaid paidbah, ki khun samla jong ka jaitbynriew Hynñiewtrep ka ba la ai kyrteng ka ‘Hynñiewtrep Youth March’ kum ka dak ban ai mynsiem ïa u Bah Ardent Miller Basaiawmoit.
“Ngi wan ban ai mynsiem ïa u Bah Ardent, kum u riew rangbah ka jaitbynriew, u ba la shim ïa kane ka sienjam ban pynlong ka jingshah thngan ha kane ka jaka ban pynbor ïa ka sorkar, ba ka por ka la dei ba kum ka jaitbynriew ba ngin ïoh noh la ka jong ka hok, ban pynbeit thymmai ne khmih biang ïa ka Reservation Policy ka ba la pyntreikam la 50 snem”, u la ong.
“Ka seng naduh ki snem ba la dep ngi la ju kdew ba ka bhah thungkam lane ka reservation policy ha ka jylla Meghalaya, ka long kum ka bih ka ba la kbum ha shyntur la 50 snem bad kane ka bih mynta ka la kylla long kum ka jingpang, ka ba la bam ïa ngi na poh”, u la bynrap.
U Bah Roykupar Synren u la kdew ba lada peit ïa ka kam ki jam ki ba lait ha ka jylla ki jaitbynriew Khasi Jaiñtia ki shah leh beiñ. “Ngi ju ïohi ba kiwei ki jaitbynriew (Garo) ki ïoh kham bun ka bhah hynrei ki jaitbynriew Khasi Jaiñtia ki ïoh duna”.
“Kum ka seng, ngi khot ïa ki khun samla na ki skul ki College bapher bapher ba kin wan ban shim bynta ha ka jingïaid paidbah bad ka long ka jingïoh mynsiem ba da ki hajar ngut, ki la wan ban shim bynta lang ha kane ka jingïaid paidbah ka ba la long mynta ka sngi”, u la ong.
U Bah Roykupar u la ong shuh shuh, “Kane ka jingïaid paidbah ka long ban ai mynsiem ïa une u riew rangbah ba yn dang ïaid shakhmat ha ka jingïaleh jong u namar ka dei ka jingïaleh na ka bynta ka lawei jong ki khun samla bad ka jingwan ban shim bynta jong ki khun samla mynta ka sngi, ka pynpaw ba kum ka jaitbynriew ym tang ki longkmie, ki long kpa hynrei ki khun samla ruh ki sngewthuh ïa ka jingkhia kane ka kam”.
“Ngi ngeit ba lyngba ka jingmih ki khun samla kan dang ai mynsiem ïa u Bah Ardent ba yn dang ïaid shakhmat khnang ba ka jingangnud jong ngi, ban ïoh la ka hok katkum ka lynti ka ba dei, ban pynbeit thymmai ïa ka Reservation Policy ka ba la pyntreikam la 50- snem”, u la bynrap.
Ki samla pule mynta ka sngi ki la wan ban shimbynta ha ka jingïaid paidbah ka Hynñiewtrep Youth March ki ba la sdang ïa ka jingïaid na MBOSE sha duh ka parkinglot ka additional secretariat ka jaka ba u Bah Ardent Miller Basaiawmoit u la pynlong ïa ka jingshah thngan.
