SHILLONG:
Ka MLA jong ka East Shillong ka Kong Ampareen Lyngdoh, ka la kyntu ïa ki khun samla ba kim dei ban ‘ïa umsnam na ka jingumsnam’, bad ki dei ban ïaishah bad ap ïa ka jingtohkit jong ka CBI halor ka jingshah siat ïap ki san ngut ki rangbah Khasi ha ka shnong Mukroh, West Jaiñtia Hills District, ha ka 22 tarik Naiwieng, 2022.
Haba ïakren bad ki lad pathai khubor, na ka liang ka Kong Lyngdoh, ka la ong ba ka dei ka jingjia kaba khlem poi pyrkhat, ‘khamtam ha kum kane ka por ba ka Ri bad ka jylla ka dang ïaleh ban ïakren ïa ka jingsuk, bad ka long kaba sngewsih’.
“Kum ka nongmihkhmat kaba la shah jied ha u paidbah, nga sngew ban ong ba wat ju pat shim kano kano ka rai halor ka jingjia ha Mukroh, namar ba ngi shu tip ba ka don ka jingshah shim ka jingim jong ki san ngut ki nongshong shnong jong ka jylla bad nga pynrem jur ïa baroh kito kiba la leh khlem da don kano kano ka jingïohi jngai ïa ka ban sa jia hadien,” la ong ka Kong Ampareen.
“Nga pynrem jur bad dawa da kawei ka sur khlem ïa peit ne sah liang ïano ïano; ba ngi kwah ban tip kaei kaba jia haba ngi shu sngap ïa ka jingïoh jingtip, ka long ba ka don kata ka jingkulmar bad lada ki kwah ban tip ïa kata ka jingtip ba janai, ngi dei ban ap ïa ka kaiphod kaba yn sa pynkhreh da ka CBI,” ka la bynrap.
Ka Kong Ampareen ka la ong ruh, “ngim kwah ban don biang kum kane ka jingjia, hynrei ngim lah ban ïakylliang ïa ka umsnam da ka jingumsnam, kumta nga kyntu ïa ki paralok sengbhalang ban ym kwah ban ïa umsnam na ka jingumsnam.”
“Ka don ruh ka jingïohsngew ba ka don kata ka jingïaphet wir kita ki nongkhaïi dieng ha kata ka khlaw hapdeng ki ar jylla, bad ka Mukroh kam dei ka jaka ba don ka jingïa kajia bad ka dei ka jaka jong ka Meghalaya, hynrei ha kata ka jingïaphet wir ban ïaknieh ïa kita ki dieng, ka don kata ka jingtakhuh hapdeng ki nongshnong shnong bad ki pulit Assam haduh ban da duh ka jingim ki san ngut ki nongshnong shnong bad uwei u Forest Guard na Assam,” ka la bynrap.
Ka kong Lyngdoh ka la kyntu ïa ki sengbhalang ban ai noh ïa ka jingsuk ha ka jylla bad ‘lada ki ong ban wan ban shim bynta ha ka jingthang mombati, ngin wan lada ki ong phong lama ïong ngin phong hynrei ha kum kane ka por ba ki khynnah skul ki khlem ïoh shuh ïa ka jingpule kaba pura na ka daw ba don u khñiang jingpang, ki dei ban ailad ïa ki khun samla kiba leit sha ki jaka pule’.
“Ha ka kyrteng jong ka jingieid jaitbynriew, ym dei ban ïuh roit ïa ka hok jong kiwei pat ki nongshnong shnong. Ïa ka shongsuk shong shngaiñ ym lah ban thied da ka spah ka tyngka, lah ban ïohi ïa kita lada ngi sngewthuh lang bad ïakren ïa kajuh ka jingkren bad dawa ia kajuh ka jingdawa da kawei ka sur khlem da don kano kano ka jingkulmar,” la ong ka kong Ampareen.
Ka la ong ruh ba ha kum kane ka por donkam ia ka jaitbynriew ba kan puson. “Lada khang ïa ki kali Assam, kaei ka jingmih nangta, la ïohi mynta ka sngi ki petrol pump ki la khang namar ba kim kwah ban wan sha ka jylla Meghalaya. Lada ka jylla kam lah ban ai tang ka jingshngaiñ ïa ki, ka mut ba kim treh ban wan shane. Kumta kaei ka ban bud ka long ka jingshah set ïa ki marbam mardih, ki dawai dashin, ki nongleit nongwan bad ki kynhun pyrkhat ki dei ban phah ïa ka jingai jingmut sha ka sorkar khnang ba ka sorkar jylla kan ïoh ban rah ban ïakren ïa kine bad ka sorkar Assam,” la bynrap ka Kong Ampareen.
“Nga ai ka jingsngewlem ïa ki bhahaïing hasem bad ïa ka jingkhublei ïa baroh ar tylli ki sorkar kiba la shimkhia mardor ïa kane ka bynta ban phah da ka jingïarap sha kine ki longïing,” ka la ong. Halor ka sienjam jong ka sorkar ban khang internet; ka Kong Ampareen ka la ong, “kawei kaba nga la ïohi ka long ba ka jingkhang internet ka long ban tem ïa ka jingpyntip kaba bakla. Hap don hi khyndiat ka jingpyrkhing. Myn shisngi mynstep ngi la ïohi ïa ka video ba shah pynïap ki paralok bad ngam tharai ba ki dei ban pynphriang ïa kum kito ki video, kum ka dak ban sngewsynei lang ïa ki bahaïing hasem.”
Ka la bynrap ruh bad ong ba lada hap ban pyrkhing, ‘ai ngin kyrshan lang bad ka sorkar. “Ha ki snem ba la dep haba jia kawei ka jingjia ha Mawlai, ka jingkhang ïa ka internet, ka la ïarap ban pyntem ïa ka jingkulmar bad kane ngan ieh ha u paidbah ban rai lang bad peit lang hynrei ban ïa kaba shah ban klang ka ding ban pynmynsaw, dang lah ban tem ïa kane ka jingïakynad,” ka la ong.
“Phin theh petrol ne da ka umpjah; ka dei ha ngi bad nga tip ka don ka jingeh kaba khraw ïa ki khun samla kiba dang pule, hynrei ki wifi ki don kumta kan ym ktah palat bad ban shu pyntem shipor, ka don ka jingïarap hynrei ym ban pynsangeh bun sngi, hynrei ai ngin kyrshanlang ïa kane ka sorkar,” ka la bynrap.
