SHILLONG:
Ka MLA ka East Shillong ka Dr Mazel Ampareen Lyngdoh, ha ka 27 Ïaïong ka la kyntu ïa u Rangbah shnong ka Laitumkhrah ba ym dei ban shu pynkhih win ïa kano kano ka mat khlem da don nongrim .
Lah ban kdew hangne ba u Rangbah Shnong ka Shnong Laitumkhrah, u la kyntu ïa ka sorkar jylla ban pynkynriah lang noh ïa ki jaitbynriew Harijan ki ba sha ha ka jaka jong ka Municipal ha Laitumkhrah.
Haba kren sha ki lad pathai khubor ka kong Ampareen Lyngdoh ka la ong ” Ngam pat ju ïohi ïa kata ka jingthoh na kano kano ka dorbar namar kim pat ju phah da ka dorbar shnong thymmai ka ba ki dang shu dep election dangshen halor kane ka mat”.
“Hynrei nga shu kwah ban ong ba ym dei ban shu pynkhih win lada kwah ban pynkhih win dei ban don ka nongrim ka ba skhem namar ban shu khot ïa ki lad pathai khubor bad ai kyrwoh ha khmat jong ki hynrei khlem pynpoi pat ïa kine ki nongrim sha ki jaka ki ba dei ban poi kan eh ai nga ban jubab lymmuh”, ka la bynrap .
Ka Kong Lyngdoh ka la ong ruh ba yn dei ban ong ba ka shong kam tip eiei haba ki don kano kano ka jingïohi ka jingioh sngew pynsakhi ïa ki da ki kot ki sla ki ba don nongrim, hapoh Laitumkhrah, kam don kono kano ka jingïakajia jaka namar kane ka jaka ka dei beit jong ka Municipal Board .
“Ki trai ki dei ban ïoh ïa ka jingpyntip ka ba nyngkong eh bad ki bor shong kim dei ban shu kren tang ha ki lad pathai khubor. Ka dei ban phah da ka shithi bad namar ba ka dei ka dorbar ka ba dang thymmai, kumta ngam tip kaei ka ba ki kwah ban kren ban pynbeit hynrei ki dei ban wan ïakren ha ka miej ïakren hynrei lada ki kwah ban shu pynkhih win te kin kren tang ha ki ladpathai khubor ka la kut’ka la ong .
“Nga kyntu ïa ki nonshong shnong ba ym dei ban shu ïakhluid kulmar, namar ngi donkam ïa ka shongsuk shongshngaiñ namar ngi la dep ban ïohi ïa ki juh ki jaitbynriew ha wei pat ka jaka ka ei ka ba jia. Kam dei ka ba suk ba lah ban shu ïa kam ban ïaleh kumne kumtai bad ngam dei ban shu sngap tang na ki ladpathai khubor, nga kwah ban ïohi ïa ka jingthoh bad lehse lada kim donkam ïa ka MLA ruh ngam tip namar ki la ïaid lait ïa nga hynrei lada ki khot ïa nga ha ka jingïalang ban ïakren ban sngewthuh ngi lah ban ïakren bad kumba ka long kumta ki la shu leit beit sha ki lad pathai khubor”ka la bynarap.
“Kumba ka long mynta kiba dei trai ia kane ka jaka ki dei ki Municipal Board, bad lada ki kwah ban kren ai ki la dei ban phah shwa ka jingujor sha ka Municipal board bad lehse kan bha ban ai da ka shithi ia ki ban shu kynnoh tuid jakhlia te ngam tip hynrei baroh ki ba sah hangne ki pyntuid lut ym tang kane kawei ka jaitbynriew”, ka la ong .
“Baroh ki ba sah hajan ka wah Thangsniang naduh basdang haduh bakut ki pyntuid ïa ki jakhlia bad na kane ka jingkynthoh ïoh wan ki nongpahara ïoh sha daiñkuna lut, shaei phin ïalam ïa kane ka mat, ngi la jurip man ka por bad ka um ka bording elektrik la ai ïa ki katkum ka kyndon ba la ai ïa baroh bad ka dei ka jaka ka municipal ka ban peit ïa kane ka pyntuid ïa ki jaboh sha ka wah Thangsniang bad haba peit ai ki wei dei ban peit lang ïa baroh ki ba pyntuid jaboh naduh ba sdang haduh da kut ka wah” ka la bynrap . Ka kong Lyngdoh ka la ong ruh ba haba don ki trai ïing dei ban trei lang bad ki trai ïing, bad kam ïashah ïano ïano ruh hangne hynrei ka kwah ban shong pdeng bad ka kwah ban tip ki kwah ban kdew ïa kaei ka phang, “Ngam don jingtip eiei ïoh namar ki ïaid lait na ka MLA, bad ngam bna ïa kane ïoh kim donkam MLA bad ka election ka la kut bad ka jingleh politik ka la dei ban kut noh, kumno ka ïaid ka election mano ba vote shano,mano ba kyrshan ïano nga tip lut hynrei nga dei ka MLA ka ba la shah jied ha ki nongshong shnong bad haba phi don kano kano ka jingïohi ïakren lang”
“Wat ju leh kumba phi dei kawei na ka bor ka ba lah lut ban ïaid lait na ki bor baroh . Kane ka long ka mat kaba khia bha bad wat ju pynshongshit ïa ki briew khlem ka nongrim namar lada jia kano kano ka jingjia phim hap bah khlieh ma phi u ba pynkhihwin .Bun ki jingjia ki ba la dei ban jia ha kane ka jaka hynrei ha ka dorbar ba la leit ka la dep ban ïatem ban pynsngewthuh bad ki dei ban ïaid da ka lynti ka ba dei namar ka shnong ka donhok ban peit ïa ka shong suk shnong shngain”, ka la bynrap.
