SHILLONG:
Ha ka jingthmu ki nongïalam ka Voice of People Party (VPP) ban leit ban ïa khih ha jan ka Secretariat na ka bynta ban pyrshah halor ka jingshaweng kam ki ophisar ka Lokayokta, na ka liang ki tnad pulit ki la trei borbah ban khanglad ïa ki nongïalam ka VPP.
Ka jingkhang ka tnad pulit ïa ki nongïalam ka VPP ban shong ïa khih ha jan ka Secretariat ka long na ka jingpynjari ïa ka 144 CRPC ha ki jaka ba marjan ka Secretariat.
Ki nongïalam ka VPP kiba la wan na ki thaiñ ka Kashari Point ki la shah bat ha ki bor pulit bad ka la don ka jingïania kaba da ki kynta namar ka jingbym shah ki Magistrate ban tur ïa ki nongïalam ka VPP sha Secretariat.
Na ka liang ki nongïalam ka VPP ba la ïalam da u MLA ka Mawlai Constituency u Bah Brightstarwell Marbaniang ki la sdang ban ïaid jubor ha kaba ka la mih ka jingkhang lad na ka liang ki pulit bad mih ka jingkhluit na ka liang ki nongkit kam ka VPP da kaba ki la ong ïa ki pulit ba “Wat ktah kti u dei u MLA” hynrei na ka liang ki pulit bad ki Magistrate ki la pyneh triang ban ym shah ban ïaid na kane ka jaka.
Kat haduh ba pynlait ïa kane ka khubor ki nongialam ka VPP ha ryngkat ki MLA ki dang don ha Kashari Point.
