SHILLONG:
U symbud myntri rangbah ka sorkar jylla, u Bah Prestone Tyngsong u la kyntu ïa ki nongïalam ka Synjuk ki Rangbah Shnong na ki thaiñ khappud jong ki shnong kiba hap ha ka Block II, ba kim dei ban ïaleh politik ïa ka kam pynbeit pud ha ka jylla.
U Bah Tynsong u la ong ba ka jingkynnoh jong ka Synjuk ki Rangbah Shnong kiba pynïaid ïa ki shnong ha Block 2, ka dei tang ka jingleh politik jong u President ka Synjuk, u bah Blik Sohtun bad u la ong ba ka jingkynnoh jong kine ki rangbah, ka long ka bym don nongrim ei ei.
Na ka liang u Bah Tynsong u la pynshai da kaba ong ba ha kine ki khyndiat sngi ba la dep, lah pynlong ïa ka jingïalang ba nyngkong jong ka Regional Committee, ha kaba ïadei bad ka jingpynbeit ïa ki jaka ba don ka jingïakajia pud hapdeng ka Assam bad ka Meghalaya.
“Na ka liang ka Synjuk ki Rangbah Shnong ka la kynnoh ba u Chairman ka Regional Committee u la ïalam bakla ha kaba ïadei bad ki shnong ha Block II. Kumba ka long mynta, ki shnong kiba ngi kam kiba hap ha ka jylla Meghalaya, ki don 22 tylli; kata ka dei ha Block 2. Na kine ki 22 tylli, 18 tylli ki dei kiba lah dep ithuh da ka sorkar namar ba ki kyrteng jong kine ki shnong ki lah don ha ki kot jingïapynbeit pud. Nangta kiba sah 4 tylli ki dei ki shnong ba kine ki Rangbah jong ki shnong ka thaiñ Block 2 ki dang shu ai kyrteng shen,” la pynshai u Bah Tynsong.
“Ha kane ka jingïalang, kine ki rangbah kiba don ha kane ka Synjuk ki la ong ba kine ki shnong kim dei kiba hap hapoh Block 2, hynrei ki dei kiba don ha Meghalaya; ïa kane ka jingkren jong ki, ngam sngewthuh namar ba kane ka rukom leh jong u Bah Sohtun, uba dei u President ka Synjuk ka paw ba u thmu ban leh politik na kane ka jingïapynbeit pud,” la pynshai shuh shuh u Bah Tynsong.
U Bah Tynsong u la ong ruh ba ha ka jingïalang jong ka Regional Committee, la dep ban batai shai ïa ka jingkam jong ka jylla Meghalaya ïa ki shnong Khasi.
“Haba ong Block I bad Block II, ka mut ba ngin dang hap ban ïakren ïa ka jingpynphai ïa kito ki shnong kiba don ki Khasi, ki Pnar jong ngi. Ngin hap ban kyntu ïa ka sorkar Assam ba kan pynphai noh ïa kine ki shnong sha ka Meghalaya,” la bynrap shuh shuh u Bah Tynsong.
“Hynrei ha kane ka jingïalang don uwei u riew rangbah uba ong ’em kine ki shnong ki hap hapoh ka jylla Meghalaya’. Ïa kaba mynta hi kumno ngin kam ba kine ki shnong ki hap ha ka jylla Meghalaya lane Assam namar ngi dang thoh, ngi dang kam ba kine ki shnong ki dei ban hap noh sha jylla Meghalaya,” la bynrap shuh shuh u Bah Tynsong.
U bah Tynsong u la ong, “namar ba dei ka por elekshon, uwei u rangbah, u jait Sohtun, uba la don lang ha kane ka jingïalang, u la sngewthuh bha ïa kane ka mat, hynrei u leit ban lum ban lang pynban ïa ki rangbah shnong bad pynsngewthuh bakla ïa ki.”
“Nga shu kwah ban ong wat ju leh politik ïa kane ka mat. Phi lah ban don ha kano kano ka party, kam lei lei tangba wat pynlong mat politik ïa kane namar kita ki 18 tylli ki shnong bad kiba ngi dang mut ban pynrung sa saw tylli ki hap ha ka Block II; kaba mut, mynta ki hap ha Assam, bad ka jingïakren kan dang sdang. Ïa u Syiem ka Hima Khyriem bad u Syiem ka Raid Nongtung, nangta ki Rangbah Shnong, ngi lah dep bthah ba kin aiti ïa ki kot ki sla, khnang ban ynda lah dei ka por ban ïakynduh hapdeng ki Regional Committee jong ka Assam bad ki Regional Committee jong ka Meghalaya , ngin ïoh ban kren shai, ban ïakren halor kine ki shnong,” la pynshai shuh shuh u Bah Tynsong.
“Hynrei uto u rangbah u kdew bad ong ba u Bah Prestone Tynsong um sngewthuh, kaba nga ruh ngam tip u don jingmut aiu; hynrei imat u thmu ban leh politik ïa kane ka mat. Nga hangne ngam don ban ong ei ei namar ba nga dei u dkhot jong ka party NPP, hynrei nga don hangne tang ban trei na ka bynta ka jingbha ka jylla,” la bynrap shuh shuh u bah Tynsong.
U Bah Tynsong u la ong ba ka long kaba sngewsih ba une u rangbah, u lum ïa ki rangbah shnong bad pynsngewthuh bakla ïa ki bad u la ong ba na ka liang ka sorkar ka ithuh ïa ki tang lyngba ka District Council, lyngba u Syiem ka Raid Nongtung bad u Syiem ka Hima Khyriem.
“Nga sngewthuh ba ka jingthmu jong u hi ka dei tang ban leh politik, hynrei ka jingleh politik jong u kan kut tang hadien ka elekshon, namar ngi pat ba ngin hap ban pyrkhat ïa ka jingbha ka Ri bad ka jaitbynriew,” la bynrap shuh shuh u Bah Tynsong.
U Bah Tynsong u la kyntait ruh ïa ka mat ba ki kdew halor ka BOP. U la ong, “ïa ki BOP ngin buh ha khappud hi bad ngi la aiti ha ki District Administration ban wad ïa ki jaka ban buh ïa ki BOP ha kine ki khappud jong ka Block 2.”
Haba kylli halor ka jingleit jurip ki bor pulit ïa kine ki jaka, u bah Tynsong u la ong ba ka por kam slem shuh ban leit ban jurip bad ban ïakynduh ïa ki nongshong shnong ban shim ïa ka rai ban buh ïa ki BOP.
“Ki bor pynïaid District kin leit ban ïakynduh ïa ki nongshong shnong ha kine ki thaiñ khappud halor ka jingbuh BOP, namar ngi kwah ban don ka jingïahunlang, na kata ka daw, kan don ka jingjuriplang,” la bynrap biang u Bah Tynsong.
U bah Tynsong u la ong shuh shuh ba ka sorkar ka kren shai ba kan ym lah ban leit buh BOP ha Block I lane Block II, hynrei kan buh ha ki jaka jong ka Meghalaya. “Namar u Assam ruh u nym shah bad lada u Assam ruh u wan buh BOP ha ki jaka ba la kam da ka Meghalaya ruh, kane kan ym long. Da kaba shai ka long ba ka Block I bad Block II kam don kano kano ka jingïakajia, hynrei ka dei beit tang ban pynphai ïa ki shnong kiba sah ki Khasi, u Assam u dei ban pynphai noh sha Meghalaya,” la pynshai shuh shuh u Bah Tynsong.
