SHILLONG:
U Symbud Myntri Rangbah ka jylla u Bah Prestone Tynsong u la kyntu ïa ki nongshong shnong ha ka jylla ba kin kiar ban pynsaphriang ïa ka khubor ka bym don ka jingshisha ha ki Social Media.
U Bah Prestone Tynsong u ba peit ïa ka tnad kam pohïing jong ka sorkar jylla, ha ka 23 tarik Lber u la pyntip hapoh ka ïing dorbar thawaiñ ka jylla ba ki pulit ki dang pynlong ïa ka jingtohkit halor ka jingshah dung uwei u samla ha Khyndai Lad bad ki dang pynlong ka jingthwet jur ïa ka longkmie kaba la kynnoh ba ka donkti ha ka ne ka kam.
Ïa kane u la jubab ïa ka jingkylli ha ka zero hour notice ba la wanrah u MLA ka Voice of the People’s Party (VPP) na Mawlai konstitwensi, u Bah Brightstarwell Marbaniang.
Haba juba ïa kane u Bah Tynsong, u la ong ba ha ka 19 tarik u Lber 2023 ha ka por kumba 6:30 Janmied ki pulit ki la ïoh ïa ka jingpyntip na Civil Hospital ha lor ka jingshah dung u wei u samla Khasi.
Ha ka ka jingtohkit ka ba la pynlong nyngkong ,la ïoh jingtip ba, u ba la shah dung u dei u ba la tip kyrteng kum u Zecharia Sohthiang, 25 snem ka rta na ka shnong Mawtary, Maydron, Umsning ka paw ba u la shah dung ha ka por 3 baje mynstep ha ka 19 Lber 2023, ha Khyndailad da ki 3-4 ngut ki runar ki bym lah ban ithuh.
Ha ka ba ïa dei bad ka ne ki pulit ki la ïoh ïa ka jingujor ejahar ha ka 20 tarik lber 2023,lyngba ka Princy Sohthiang ka hymmen jong une u briew u ba la shah dung ha Sadar PS bad la register ïa ka case ha ka kyndon jong ka case No 58.(03)2023u/s/326/307/34 IPC.
Ha ka ba ïa dei bad ka ne ïa ka jingtohkit la pynïaid shakhmat hynrei halor kane ka bynta la lap ruh ba u ne u briew u ba la shah dung u la ai ka kyrwoh ka bymbiang halor kane ka jingjia.
“Ha ka por ba la leh ïa ka jingtohkit, la lap ba une u ba la shah dung (u Bah Sohtiang) u la leit ban rung jubor ha ka wei ka kali ka ba don ha ha Khyndailad, hajan ka surok ka ban leit sha Hotel Pegasus ha ka 18 tarik Lber 2023 ha ka por 9:45 janmiet eiei ”.
“U la pan jingïarap na ki saw ngut ki briew ki ba don ha kawei ka kali ban ïarap ïa u ban wad ïa ka scooty jong u, ka ba u la kam ba u la ngat ha ka jingjia accident ha Mawprem”.
“Na ka liang kine ki briew ki la leit buh ïa u sha Mawprem, bad haba la poi ha Mawprem, u Bah Sohthiang, u khlem ïalap ïa ki sha ka jaka ba don ka jingjia accident hynrei u la ïathuh ïa kine ki briew ha kali ba u la shah dung da ka tari bad kyrpat ïa ki ba kin leit buh ïa u sha ka shnong Mawshibuit ka ba u sah wai”.
“Ha ba la poi ha ka shnong Mawshibuit ha ka por 12:30 baje mynstep la aiti ïa u ne u briew ha ki ar ngut ki bahaïing ki ba sah lang bad u .Ha ka por 3:59 mynstep uwei na ki bahaïing jong u ki la pyntip ïa ka EMRI, halor kane ka jingjia bad kyrpat na ka bynta ka kali Ambulance , ka ba la wankit ïa u sha Civil Hospital ha ka por 5:30 mynstep”.
Hadien ka ne ïa u ne u ba la ngat ha ka jingmynsaw la phah kit noh sha NEIGRIMHS Hospital na ka bynta ban ïoh ïa ka jingsumar ka ba khambha ha ka jingsynran lang ki pulit.
“Ha ka 21 tarik lber 2023 une u briew u la ai biang ïa ka kyrwoh ha u Incharge Officer (IO) ba u la shah dung da ka tari na ka wei ka longkmie ka bym lah ban ithuh hajan ka Hotel Pegasus bad ïa kane ka longkmie u lah ban ithuh, ka jingtohkit ka dang ïaid sha khmat ban ïoh ban kem ïa kane ka longkmie ka ba la shah kynnoh”.
“Nga kwah ruh ban kyntu ïa ki nongshong shnong ha ka jylla ba kin ailad ïa ka aiñ kan leh ïa kaba donkam bad ba kim dei ban pynsaphriang ïa ki ki khubor bym don kano kano ka jingshisha khamtam ha Social Media bad ki pulit kin sa leh ïa ka ba bha tam ban pynïoh ïa ka hok ïa u lanot u ba la ngat ha kane ka jingshah thombor”, u la ong.
