NONGSTOIÑ:
Watla kala ïoh pdiang ïa ka khusnam kum kawei na ki PHC kaba lah ban ai jingshakri kaba bha na ka bynta ban pyllait im ïa ki longkmie bad ki khyllung pynban kaba sngewsih ka long ba ka Maweit PHC ka dang shah ieh beiñ ha ka sorkar ha kiba bun ki liang.
Ha ka jingleit jurip kaba dang shen jong ka Seng Federation of Khasi Jaiñtia & Garo People ïa katei ka PHC, hapoh ka jingïalam u Samla Anthony Umiong President, la lap ïa shibun ki jingduna ha katei ka PHC la ka long ha ki surok ban rung sha PHC, ka umbam umdih, ka jaka pynïeng kali, ka bording ilektrik nalor ka jingjot rathai.
Shuh shuh ka Seng kala lap ruh bad ka jingjot rathai katei ka jaka sumar kala long shaba palat ha kaba ha ki por slap jan baroh ki kamra jong katei ka PHC ki nongtrei ki hap ban kup shatri wat hapoh karma namar ka jingjaw um.
Hynrei hapdeng kiba bun ki jingeh bad ki jingshah ieh beiñ katei ka PHC ha ka sorkar u Doctor u ba peit ïa katei ka PHC u Dr. M. Mazundar u la lah ban pynïaid beit ïaid ryntih wat ha kiba bun ki jingduna kat haduh ba kan ïoh khur ïa ka khusnam kum kawei naki PHC ba ïaid beit hapoh ka jylla na ka National Health Mission.
Ki dkhot jong ka Seng kila pynpaw ruh ka jingsngewnguh kaba khraw ïa u Dr. M. Mazundar u ba la leh sbun ruh ban noh synñiang dala ka jong ka jingsiew na ka bynta ban pynbiang ïa ki katto katne ki tiar hapoh katei ka PHC.
Kumta na ka liang jong ka Seng ka dawa na ka sorkar bad ka tnad badei peit khamtam ïa u Myntri Rangbah u Conrad Sangma ba dei ban kyntiew kyrdan noh ïa katei ka PHC kumba u la kular ha kapor ba u wan sha Maweit ha shwa ka election 2023.
