SHILLONG:
Wat la kam ïohi ki khmat hynrei ka pule puthi ka dei kaba ha khmat tam ha ka jingim jong ka.
Ka samla Bertina Lyngdoh kawei na ki samla kaba don ïa ka jingduna ha ka bor ïohi ka la pynpaw ïa ka jingsngewkmen ba ka la lah ban pyndep ïa ka National Eligibility Test bad ka Junior Research Fellowship.
Na ka liang kane ka samla ka la ïathuh ba kala ïa khun ïane ka eksamin la lai sien bad ha ka sien kaba saw ka khlem lah ban leit namar ka dei ha ka por pakhang Shnong na ka daw jong ka khlam Covid bad kane ka dei ka sien kaba san ba ka thoh bad ïoh ïa ka jingjop.
“Nga sngew sarong ba nga long ka wei na kiba nyngkong napdeng kiba duna ha ka bor ïohi ban pass ïa kane ka assistant professor bad ïa ka eksam Junior Research Fellowship,” ka la ïathuh.
Shuh shuh kala ïathuh ruh ba na ka liang ka jong ki, ki dang tih bniah ba lah don ne em ha north east jong ngi kiba la pyndep ïa ka NET eksam bad ïa ka JRF napdeng ki briew kiba duna ha ka bor ïohi, bad haduh mynta kim pat lap ba don kum kita.
“Ngin hap ban tih bniah bha lah don ne em ha ka North East baroh ka wei kiba pyndep ïa kane ka kyrdan pule, hynrei ha Meghalaya dei tang ma ka kaba la lah ban pyndep haduh kat kane ka kyrdan,” ka la ïathuh.
Ka la bynrap ruh da kaba ong, “Nga dap da ka jingsngewkmen ba ngan long kaba lam khmat na ka bynta ki samla kiba don ïa ka jingthrang ban pynurlong.”
Haba ïadei bad ki jingeh kiba ka ïa kynduh, na ka liang ka samla Bertina ka la ïathuh ba bun ki jingeh kiba ka ïa kynduh ha ka lynti jong ka namar ka hap ban shaniah ha ki wei pat, bun na ki briew kim tip ka kot aiu ba ka don kam bad ha kata ka kot kiei kiba don bad kim lah ban pynlut ïa ka por ka jong ki ban shong bad ka.
Ka la bynrap ruh da kaba ong bun kim lah ban pynlut ïa ka por ka jong ki ban pynpule na ka bynta jong ka, ka hap ban pule ïa ki kot kiba ka pynkhreh bad teng teng kam lah ban pyndon kam ïa ka Laptop namar ba ym don bording.
“Don ki briew kiba leh bha tang na jrong bad nadien pat ki long arsap, ki pyrshang ban tan ïa ngi sha dien, la ka dei ha ka kam ka jam ne ha kiwei pat, kine ki dei ki jingeh kiba ki samla ki ïa kynduh,” ka la ong.
Na kaliang kane ka samla ka la kyntu ïa ki samla pule ban trei shitom watla bun ki jingshah kynthoh ki don.
“Don ki sngi kiba ngam lah ban set ïa ki ummat, wat hapdeng u paidbah ba bun, nga sngew kumba ngan kynran dien noh, hynrei haba nga sngap ïa ka mynsiem ka jong nga , ka ong em phi ïaid ha ka lynti kaba dei, phi trei shitom bad U Blei Un sa leh ïa kaba dei ban leh,” ka la ong.
Ka khubor kaba ka phah sha ki samla pule ka long, “Phi long kat ka ba long, phi dei ban hun, haoid ha ka jingim briew, ngi don ki jingeh kiba ngi hap ban ïaid lyngba, hynrei lada ngi sngap ïa kita baroh phin ym lah ban long u khlur ne u rishot u ba skhem ban tei ïa ka lawei”.
“Haba nga pass kham kmen ki paralok, ki briew bad ka imlang ka sahlang ban ïa kaei kaba nga kmen. Lada phi sngap ïa kaei kaba ka mynsiem ka ong phin long u khlur na ka bynta ïalade bad ïa kiwei. Nga ïalade nga sngap ïa ka mynsiem ba ka kren, nga khlem sngap ïa kaei kaba ka jingmut jingpyrkhat jong nga ka ong,” la ong ka samla Bertina.
