ÑONGSTOIÑ:
Ka ophis jong ka State Tuberculosis lyngba ka ophis jong u District Tuberculosis Officer, West Khasi Hills District ka la rakhe ïa ka World Health Day ha ka 6 tarik Ïaïong ha kaba ki la pynlong ïa ka street play ha ïew Nongstoiñ kum ka jingai jinghikai ban pynshai sha ki paidbah nongshong shnong shaphang ka jingpang TB bad kumno ban tip lada ïoh ïa kane ka jingpang, kiei ki dak ki shin bad kumno ban ïada na kane ka jingpang.
Ha kane ka sngi la ïoh ka jingbatai lyngkot na ka Kong Tracy Kharkamni ba dei ka State Coordinator, State TB Office khnang ban pynsngewthuh sha ki paidbah halor kane ka jingpang.
Ha kane ka sngi, la ïa don lang u District Tuberculosis officer jong ka West Khasi Hill District, u Dr. R. Basaiawmoit ha kaba u la ai ka jingpynshai sha ki paidbah shaphang ka jingpang TB bad kumno ki dei bn leh ban ïada ïalade ban kiar lypa khnang ban nym kem ïa kane ka jingpang da kaba ki pyndonkam ban phong ïa ki mask, ban sumar khuid ïalade bad ka imlang sahlang bad ban ym ban biah pathar.
Shuh shuh u Dr. Basaiawmoit u la kyntu ïa ki paidbah ba kin nym dei ban isih ne ñiewbein ïa kiba pang TB hynrei dei ban kyrshan ïa ki ban lait na ki jingsngewsih bapher bapher namar dei na ka jingkyrshan jong ki para briew ba ki nongpang ki ïoh mynsiem ban ïaleh pyrshah ïa kane ka jingpang.
Nalor ki jingbatai jong u Dr. Basaiawmoit, la don ruh ka street play ha kaba la wan ban ïashim bynta da ki khynnah pule ka Social Work Department, Women’s College Shillong , ha kaba ki lah pyni ruh ïa ki drama bad ka jingshad ban hikai shaphang ka jingpang Tb.
La don ruh ka bynta ha kaba la ailad ïa ki paidbah ban buh jingkylli shaphang ka jingpang TB bad kumjuh la ai khusnam ruh sha ki paidbah kiba kloi ban ïashim bynta lang halor ki jingkylli bad ki jubab (quiz competition) ha kaba ïadei bad ka jingpang TB.
Shuh shuh, shwa ban pynkut ïa kane ka prokram ha kane ka sngi na ka liang ka ophis jong u District Tuberculosis Officer ka West Khasi Hills district , ka la ïoh ban sam sha ki paidbah ïa i kot lyngkdop kaba dei halor ka phang “Ka TB ka pynïap namar ka jingkheiñ sting bad ka jingleh klet”.
