SHILLONG:
Ki nongrep jong ka Bhoirymbong ha Ri Bhoi District ki la kynnoh ba ka jingot kilo ïa ki marrep ka dang ïai bteng watla ka la don ka jingbthah na ka liang ka Khasi Hills Autonomous District council (KHADC) ha ka 15 tarik Jymmang ban pynkut noh shisyndon ïa ka jingot kilo ha ki iew ki hat kiba hap hapoh u pud u sam jong ka council.’
Dei halor kane ka jingeh ba ki nongrep ki ïai mad ki la shim da ka rai ban leit ïakynduh ïa ki nongïalam ka Hills Farmers’ Union (HFU) Mawlai Circle ha ka 22 tarik Jymmang, bad mar mar kane ka seng mynta ka 24 tarik Jymmang ka la wan ïakynduh noh ïa u Chief Executive Member (CEM) jong ka KHADC, u Bah Titosstarwell Chyne ban pynsngew ïa kane ka jingeh jong ki nongrep.
Haba kren bad ki nongthoh khubor mynta ka sngi, u President ka HFU Mawlai Circle, u Comingstar Kharumlong u la ïathuh ba ka jingwan ïakynduh jong ki ïa u CEM ka dei halor ka jingwan ujor jong ki nongrep sha ka seng halor ka jingshah ot kilo ha ka iew kaba don ha Bhoirymbong.
U Bah Comingstar u la ïathuh ruh ba ha ka jingïalang bad kine ki nongïalam ka seng, na ka liang u CEM u la pynthikna ban ïakren bad ki nongkhaii ha kaba kan don sa kawei pat ka jingïalang bad ki nongkhaii ban ïakren pynbeit ïa kane ka jingeh.
“Ki nongrep ki iengskhem bad ki pyntip sha ngi namar ba ki lah tip ïa ka notification ba lah phah da ka District Council, kumta ki iengskhem ba ymdei shuh ban ot kilo”, la ïathuh u President ka seng ki nongrep.
U la ong ruh ba ki nongrep ki dei ban long kiba shai namar kane ka jingleh ka long kumba ki dang don ha ka jingdum bad ong ruh ba watla ki nongrep kiba mynshwa ki kham duna ka jingnang jingstad hynrei kane ka lah ïapher bad kaba mynta.
“Ki nongrep kiba mynta kim dei kiba dang duna ka bor pyrkhat bad ki dei ban sngewthuh ba kane ka kam ot kilo kam dei kaba shisha” bad une u President ki nongrep u la kyntu ruh ïa ki nongrep ha kiwei pat ki jaka ba ki dei ban ieng pyrshah beit ïa kane ka kam ot kilo da kaba kdew ba kane ka dei tang ha ka jylla Meghalaya bad kam don sha kiwei pat ki jylla.
Da kaba kdew ruh ba ka kam ot kilo ka dei kaba beaiñ, u Bah Comingstar u la pynpaw ïa ka jingsngew lyngngoh balei ba ki nongrep ha ka jylla ki dang hap ban ïakhun pyrshah ïa kane?
“Ym donkam seng ban ïakhun ïa kane ka ot kilo. Shawei ka dei kaba beaiñ, hynrei kaba lyngngoh ka long ba hangne ngi dang hap ïakhun ïa kane”, la ong shuh shuh une u President bad ong ruh ba ymdei ban da lamwir ban kyrpad ïa ka sorkar ban thaw da ka aiñ namar kane ka lahdei lypa ka kam beaiñ.
Ha kajuh ka por ruh, u General Secretary ka HFU Central Body, u Bah Alfond Kharsyntiew u la kyrpad ïa ki nongkhaii ba ki dei ban bud ïa ki kyndon bad ki aiñ katkum ka jingbthah jong ka KHADC bad u la kyntu ruh ïa ki nongrep ba lada dang don kaba kum kane ka jingot kilo ba kin pyntip sha ki nongïalam ka seng.
U la ong ruh ba ha kine ki khyndiat sngi na ka liang ka seng kan leit ban ïakynduh bad ka myntri ka rep ka riang, ka Kong Ampareen Lyngdoh ba kan khot da ka Cabinet kaba kyrpang na ka bynta kane ka kam ot kilo.
“Ngim don ka jingïashun hapdeng u nongrep bad u nongkhaii, hynrei ngi kwah ban wanrah da ka aiñ kaba biang lang”, la ong u Bah Alfond.
