SHILLONG:
Ka Executive Director jong ka State Disaster Management Authority (SDMA), ka Kong Matsiewdor War Nongbri, ha ka 16 tarik Jylliew ka la ong ba ym shym la ïoh kaiphod halor kano kano ka jingmynsaw na ka jingpynjot ka mariang kaba la jia ha ka taïew ba la dep.
Haba kren halor ki jingtwa khyndew ba la jia ha ki katto katne distrik, ka Kong Matsiewdor ka la ong ba ka SDMA ka dang trei ban pynkhuid ïa ki jaboh jabaiñ na kine ki jaka, bad ba dang ap ïa ka kaiphod halor ka jingïaid ka kam.
Ka la ong ruh ba ka jingtip ba kham bniah halor ka jingjulor bad ka jingduhnong na ka daw jong ka jingpynjot ka mariang, yn leh ha ki distrik bad hadien kata ki bor pynïaid distrik kin sa kheiñ ïa ki jingjulor bad phah ïa kata sha ka SDMA.
Haba kylli la yn khang ïa ki skul bad ki kolej ha ki distrik ba shah ktah ka Kong Matsiewdor ka la ïathuh ba ïa kata ka rai yn shim da ki Deputy Commissioner.
