SHILLONG:
U Myntri Rangbah ka jylla u Conrad K Sangma, u la ong ba katba ka jylla kam pat lah ban pynmih ia ka bording elektrik, na kiwei kiwei pat ki bor mariang, ka long ka bym lah long ba ka jylla kan lah ban pyndap ia ka jingdonkam ia ka bording na ka bynta shirta.
“Ka jylla ka donkam kumba 1,700 million units ka bording elektrik man u snem, hynrei tang kumba 1000 haduh 1100 million units ka bording ka jylla ka lah ban pynmih hi man u snem bad kumta ka jylla ka dang duna sa 600-700 million units ka bording”, la ong u Myntri Rangbah haba kren bad ki ladpathai khubor.
“Ia kane ka jingduna la ialeh ban pyndap da ka ba iasam bording eklektrik na ki central agency bad kiwei pat da ka ba shuthied na ki iew die bording, bad kane ka dei ka jinglong jingman jong ka jylla kaba ka mad kumba 30% ka jingduna”, u la bynrap.
U la ong shuh shuh, “Ka jingeh ba ka jylla ka mad ha kaba iadei bad ka bording eklektrik ka long namar ia ka bording la ju pynmih beit tang na ka hydro based bad haba don ka jingduna ka um ka don ka jingshah ktah ha baroh ki unit kynthup ia ka central unit ruh”.
U la bynrap, “Katba ka jylla kam pat long ka ba biang ban pynmih ia ka bording elektrik na ki wei pat ki bor mariang ka jylla kam ym lah ban pyndap bording na lade”.
U Myntri Rangbah ka jylla u la ong ruh, “Na ka liang ka sorkar jylla mynta ka dang don ha ka bynta ban lah ban pynurlong ban shim ia kum kine ki sienjam ban ialeh ban pynmih bording na ka bor sngi. Wat la ka bor sngi ruh kam dei ka ba lah ban ai jingmyntoi barabor namar hap ban shaniah ia ka jingshit ka sngi”.
U la bynrap shuh shuh, “Kumta na ka liang ka sorkar halor kane ruh kan dang hap ban bishar bha bad ngi kyrmen ba suki suki ngin lah ban dang wad kiwei kiwei pat ki lad ki lynti ban weng ia kane ka jingeh”.
