SHILLONG:
Ha ka jingai jingkren ha ka sngi kaba ar jong ka Chief Minister Start-up bad Corporate Social Responsibility (CSR) Week ha ka 15 tarik u Naiwieng, ka Nimisha Varma ka la batai bad pynpaw ïa ka jingïaid lynti bad ka jingsdang ïa ka Aloe E-Cell, hapdeng ba ka la sdang ryngkat lang bad ki dkhot nongseng kane ka kompeni ha ka por ba ka dang pule ha college ha u snem 2019.
Ka Varma ka la ïathuh ba kane ka kompeni ba ka seng ka dei kaba long jan bad ka mariang shispah na ka shispah bad kam don jingktah ei ei hapdeng ba ka la pynmih ki batteri ba la pyndonkam da u Aloe Vera, bad u dei u mar ba la ithuh da ka pyrthei baroh kawei, bad ka jingpynmih kine ki batteri ki dei kiba la buh thong ban pynkhuid ki jaboh ba mih lyngba ki electronics, ka lyer jaboh bad kiwei de ki jingeh kiba sakhi bad paw.
Kine ki batteri ki dei kiba la shna ban pynmih bujli ha ka jaka jong ki pencil batteri kiba don shibun ka jingma kaba ki briew ki pyndonkam ha kiba bun ki tiar ba donkam batteri, la kdew bad pynpaw ka Verma.
Shuh shuh ka la ïathuh ba kine ki batteri ki dei kiba la ithuh da kiba bun ki shnat treikam bapher bapher kynthup ka Start-Up India.
Ka Varma ka la batai ruh ba ka jinglah ban pynkylla ïa ka jingmut kaba don sha ka kam, kam lah satia ban urlong tang ha ka shimiet, hynrei ka dei ka jingïaid lynti kaba jlan kaba donkam ka jingïasaid hapdeng kiba bun ki riewshemphang, ki jingai jingmut, ban pyntreikam ïa bad ka jingtrei shitom.
“Ka dei kaba trei khlem da kheiñ por, ka jingpyrshang kaba khlem shongthait, ka jingmad kiba bun ki jingphiel napdeng kiwei de”. La pynkut ka Verma
