SHILLONG:
U nongwad RTI ka jylla u Bah Disparsing Rani u la ong ba kiba bun na ki projek ka Smart City Project ym pat shym la paw dak pyntrei eiei katba katkum ka RTI kaba u la pan na ka Meghalaya Urban Development Authority (MUDA) halor ka mang tyngka kaba la ïoh na bynta ka jingpyntrei ïa ka Shillong Smart City Project ka long kumba 638.78 klur tyngka na bynta ki jingpyntrei ïa ki 11 tylli ki projek bad ka jingïaid kine ki jingpyntrei ka la kynjoh kumba 31.20% bad na ka liang ka sorkar pdeng ka la pyllait ïa ka pisa kaba kot 245 klur tyngka hynrei katba ka jingpyntrei pat kam pat ym ïohi dak eiei.
Haba kren sha ki lad pathai khubor ha ka 14 tarik Nohprah, u la ong ba ki 11 tylli ki kam kiba la ïoh ka mang pisa na bynta kane ka jingpyntrei na ka tnat Ministry ka Housing ka sorkar India ki long, ka jingpyntrei ïa ka Smart Road ba 6 KM, ka jaka pynieng kali ha Motphran, Waste Water Treatment Plant, ka jingkynshew umslap, Commercial Complex ha Polo, Fire Safety, Development of tourism cum cultural Center, Ka jingtei bad jingpynbha ïa ka iew Municipal Market Laitumkhrah, ka jingpynbha ïa ki jaka pynïeng kali ha Shillong, ka jingpyntrei ïa ka ICCC bad ka Traffic Awareness ïa ki khynnah skul ha ki jaka pule jong ki.
U la ong ba na kitei ki projek kiba la ïohi ba ki don ki jingpyntrei ne ba ki kam ki la paw dak ka dei tang ka jingpynbha ïa ka jaka ïeng kali, ka jingtei ïa ka Commercial Complex ha Polo hynrei katba kiwei pat ym pat ïohi dak eiei.
“31.20% ki kam la dep pyntrei ka sorkar ka la kam, hynrei kata ka Smart Road ba 6 KM ym pat ïohi dak, ka Mechanised multi-level Car Park MLP ha Motphran Junction, Waste Water Treatment Plant lyngba ka in-situ Nallah Treatment Technology, ka Rain Water Harvesting, Fire Safety, Development of Tourism cum Cultural Center, Construction and Re-development jong ka ïew Laitumkhrah Municipal Market, ka jingpyntrei ïa ka ICCC bad ka Traffic Awareness na bynta ban ai jinghikai ïa ki khynnah skul ha ki jaka pule jong ki bad kine ki projek ym pat shym la ïohi dak eiei ba ka la don ka jingpyntrei kumba la kam ha ka RTI bad ki projek ba kala don ka jingpyntrei katkum ka jubab na ka RTI ka dei tang ka jingtei ïa ka Commercial Complex bad ka jingpynbha ïa ki jaka ieng kali,” u la ong.
