NONGPOH:
La san sngi ba uwei u rangbah na ka shnong Pahammawleiñ 20mer, ha Ri Bhoi, u la shah pynïap ha ki runar, ha ka por ba u thmu ban leit sha Lyngkha bad kat haduh mynta ki Pulit Ri Bhoi, kim pat lapksai eiei ruh em ïa ki runar kiba la donkti ha katei ka kam pynïap briew.
Lah ruh ban kdew hangne, ba u (L) Bah Elius Ryndong 60 snem tam ei ei, u la shah pynïap dusmon noh ha ki riew runar, kata ha ka por ba utei u rangbah u dang thmu ban leit sha ka jaka rep jong u bad ka rukom pynïap ïa utei u rangbah, ka dei ba ki runar ki la tied bad bom beit ha ki bynta ka khlieh, tad haduh ba ka khlieh jong utei u rangbah, ka la pra hi phom. Utei u rangbah, u la mih na ïing ha ka por 7 baje ei ei mynstep, na ka bynta ban leit sha lyngkha bad ïa ka por ba u la shah pynïap, ym shym la tip namar ym don kiba la ïohi bad naduh katei ka por ba u mih, kiba haiing kim tip ei ei shuh, hynrei kaba la pynkyndit eh ïa ki, ka dei hadien ba ha ka por 5:30 baje ei ei janmiet, ki la ïoh jingtip halor ka jingshah pynïap ïa utei u rangbah. Haba ïadei bad katei ka jingjia shah pynïap ïa utei u rangbah, ki Pulit Ri Bhoi, ki la ïathuh ba kim pat lapksai eiei ruh em, hynrei ka jingtohkit halor katei ka jingjia ka la ïaid beit shakmat, na ka bynta ban ïohkem ïa ki runar, kiba la donkti ha katei ka kam pynïap briew
