SHILLONG:
U Symbud Myntri rangbah ka jylla, u Bah Prestone Tynsong, u ba peit ruh ïa ka tnad PWD ha ka sorkar jylla u la ong ba ym pat ïoh jingtip eiei halor ka jingpynthud ki sengbhalang ïa ka jingpyntrei ïa ka surok Shillong Dawki.
Lah ban kdew hangne ba ha kaba ïadei bad ka surok Shillong Dawki ka High Court ka la bthah ïa ka sorkar ban shim khia ban tehlakam ïa ki sengbhalang kiba la pynthud bad pynslem ban lah ban pyndep ïa kane ka surok.
“Halor ka surok Shillong-Dawki, ka jingpyntrei ka sah teng, ym tang na ki sengbhalang hynrei ka dei ruh na ki trai jaka ki ba ngi donkam ban ïakren bad pynkohnguh ïa ki namar ba ka rukom bat ïa ki jaka puta ka kham pher ha ka jylla kumta ngi donkam ban ïoh ka jingmynjur jong ki”.
U la bynrap “Hynrei ki sengbhalang ruh ki dei ban sngewthuh ïa kane ba kane ka surok ka dei ka ba donkam tam na ka bynta ban kyntiew ïa ka ïoh ka kot, ka kam jngoh kai pyrthei ha ka ba ngi donkam ban pyndep noh kham kloi ïa kane”.
U Bah Prestone u la ong ba “Haduh mynta ngim pat ïoh kano kano ka jingujor halor ba don ki sengbahlang ki ba pynthud ïa ka jingpyntrei ïa kane ka surok hynrei lada don kum kata ka sorkar kan sa shim khia lada ka ïoh ïa ka jingujor na ki ne ki company ki ba pyntrei ïa kane ka surok”.
Lah ban kdew hangne ba ka jingpyntrei ïa ka surok Shillong –Dawki mynta ka la ïaid shaitshait, lait noh tang ha ki katto katne ki bynta ki ba ka kam la hap ban pynsangeh na ki ba bun ki daw.
