SHILLONG:
Ka jingkyrmen ba ka shnong Sohra kan ïoh ïa la ka jong ka District ka la kham skhem mynta, hadien ba ki nongïalam jong ka kynhun ‘Sohra District Demand Forum’, ki la wan ban ïakynduh ïa u myntri rangbah ka jylla, u Conrad K Sangma, mynta ka sngi, ha ophis treikam jong u ha Secretariat.
Lah ban kdew hangne ba ka Sohra Civil Sub- Division, ka dei ka Sub- Division kaba la rim tam ha ka jylla, hynrei haduh mynta ym pat lah ban kyntiew ïa ka sha ka kyrdan District na ki katto katne tylli ki daw bad ka jingïakhun ban dawa ban kyntiew District ïa ka Sohra Civil Sub –Division, ka la long mynta lah 15 lane 20 snem ei ei.
Haba ïakren bad ki lad pathai khubor, na ka liang u General Secretary ka Forum, u bah John Thabah, u la ïathuh ba ka jingïalang bad u myntri rangbah ban pynsngew halor ka jingdawa ban kyntiew ïa ka Sohra Civil Sub Division sha ka District ka la long kaba i don jingkyrmen bha mynta ka kynti.
“Ha ka jingïakynduh jong ngi bad u myntri rangbah ka jylla, u Conrad K Sangma, ngi la pynsngew ha u halor ki jingtyrwa ha kaba ïadei bad ka mat ban kyntiew District ïa ka Sohra Civil Sub-Division. Na ka liang u myntri rangbah ruh u la ai ka dak ka shin kaba i don jingkyrmen bha halor kane ka mat bad u la ai ka jingkular kaba sngewtynnad bad u la ong ruh ba ka headquarter kan long ka Sohra hi,” la ïathuh u bah John.
“Ngi la kyntu ïa ka sorkar ba kan phah sha ngi ïa ka jingai jingmut jong ka bad ha ki sngi ban wan ngin bishar ïa ka jingtyrwa ka sorkar, hynrei ka jingïakren kaba la long mynta ka sngi, ka dei kaba don jingkyrmen bha,” u la ong. U la ïathuh ruh ba halor kane ka mat, na ka liang u myntri rangbah u Ia bthah ba yn sa phah bishar ha u Chief Secretary ka sorkar jylla. U bah Thabah u la ïathuh ruh ba lada ka Sohra Civil Sub Division kan shah kyntiew sha ka District, kumba 200 tylli tam ki shnong kin sa shah kynthup, bad kine ki shnong kin dei na Sohra bad Shella konstitwensi.
“Halor ki mat jingeh kiba na ka liang ka sorkar ka la pynpaw, ngi la dep ban ïatai bha; bad ki jingeh ki don tang ha ki katto katne ki shnong, bad kan shong ha ka jingstad jong ka sorkar ba kan pynbit pynbiang ïa kine ki jingeh,”u la ong.
U la ïathuh shuh shuh da kaba ong, “ka kaiphod halor ka imlang sahlang, ka ïoh ka kot bad ka roi ka par jong kane ka thaiñ lah dep ban phah sha ka sorkar naduh u snem 2018 bad ka dei ruh ka Sub-Division kaba lah rim tam; wat ki Sub-Division kiba dang thymmai ki la shah kyntiew sha ka District, hynrei ka Sohra haduh mynta kam pat lah ban ïoh. Kumba ka sorkar ka ju ong ba ka jingkyntiew District ïa kino kino ki Sub-Division ka long ban wanrah ïa ka jingïajan ha ka synshar, khaddar kumta ngi ruh ha kane ka thaiñ, ngi donkam ïa kane ka jingïajan,” la bynrap shuh shuh u Bah John.
U la bynrap shuh shuh da kaba ong ba na ka liang u myntri rangbah ka jylla ruh u kubur ba ka East Khasi Hills District ka dei ka District kaba lah heh bad lah donkam ban phiah noh khnang ban lait na ka jingdheng kali ha nongbah Shillong. U myntri rangbah u la kular ba ka kynhun myntri jong ka sorkar MDA kan shim khia ïa kane ka jingdawa.
