SHILLONG:
U Chief Executive Member (CEM) ka Khasi Hills Autonomous District Council (KHADC) u Bah Pyniaid Sing Syiem, u la kyntu ïa ki shnong kiba hap hapoh ka jingpeit ka KHADC ban ai ïa ki jaka na ka bynta ban shna ïa ki Resource Recovery Center (RRC), khnang ban lah ban pynduna noh ïa ka jingkhia jong ka jaka bret ñuit ha Marten, kaba don ha Mawlai .
Myn ha ka 18 tarik Nohprah 2023, u CEM ka KHADC u la aiti ïa ka Trok kit ñuit kaba la mang na ka Chief Minister Development Fund jong u snem 2022-23 ha ka jinglut kaba la kot sha ka T.23 lak, sha ka Dorbar Shnong Rynjah.
Ha ba kren ha kane ka sngi u bah Pyniaid u la ong ba ka jingpynlait ïa ki skhim bapher bapher ha kaba ïadei bad ka Solid Waste Mangement kane ka long hadien ba la ïoh ïa ka jingïatai halor ka jingwanrah ïa ka khuid ka suba ha Ri Khasi, bad na ka liang ka Council ka la ïoh ruh ban wanrah ïa kawei ka aiñ kaba la tip kum ka Solid Waste Management Act 2020, ka ba la mynjur da u Lat ka jylla bad lyngba kane ka aiñ, ka Council ka la ïoh ka lad ban ïa trei lang bad ki Hima ki nongïalam shnong ban wanrah ïa ka khuid ka suba.
“Haba kdew halor ka khuid ka suba, lada ngi phai sha ka shnong Mawlai kaba don ïa ka jaka ban buh ïa ki ñuit na ka Nongbah Shillong, ka Marten katno ka long kaba sngewsynei ban peit namar baroh ki ñuit ngi leit buh shatei”.
“Kumta kum ka District Council ka ban ïa trei lang bad ki bor shnong, kan ym dei tang ban aiti ïa ki kali kit ïa u ñuit na ki shnong hynrei ka kwah ban pyrkhat ruh ban wanrah da ki Resource Recovery Center (RRC) ha man ki shnong ki thaw ha Ri Khasi”, u la ong.
U la bynrap, “Ka RRC ka long na ka bynta ki shnong kiba don ki jaka ban pynsaphraing ïa ki ñuit ha ka rukom kaba dei, bad kan long ruh kum ka jaka ban ai jingshai sha ki paidbah ba ka RRC kan long kum ka lad ïohkam ïohjam bad ka jingkha pisa na ki ñuit” .
U Bah Pyniaid u la ong ba “ngi kyntu ïa ki shnong kiba don ïa ki jaka ba kin ai ïa ki jaka na ka bynta ban buh ïa ki RRC khnang ban ym donkam shuh ban leit buh ïa ki nuit sha duh marten hynrei ban lah ban pynbit pynbiang tang ha ki shnong hi” .
“Ka jingthmu ba ha khmat ka District council ka long ban ai ka jingïarap na ka bynta ki jaka ïew ki shnong ki jaka paidbah ban ïoh ban ai jingïarap lyngba kine ki skhim bapher bapher”.
Ha kane ka sngi ka na ka liang ka Dorbar Shnong Rynjah ka la ai khusnam ruh ïa ki nongtrei ASHA bad Aganwadi ban ai jingithuh ïa ka jingshakri jong ki ha ka imlang sahlang.
Ha kane ka jingïalang la don lang ruh u MDC u Bah Bindo Lanong, u Syiem ka Hima Mylliem u Paiem Ainam Manik Syiem, u Rangbah Shnong, ki longkmie, ki nongshong ïew bad ki paid nongshong shnong.
Na ka liang u Syiem ka Hima Mylliem u Paiem Ainam Manik Syiem ula pynbna ban synñiang da ka song pisa sha ka Dorbar Shnong.
