SHILLONG:
Wat hadien ba la pynbna da ka tnad Transport ka sorkar jylla ha ka 25 tarik u Lber, 2023 ban shim biang ka bai-kali kumba myshwa hashwa jong ka jingwan ka khlam Covid-19 hynrei dang ïohi pat ïa ki nongñiah kali kamai khamtam ki Draibar Taksi ki dang shim kato kajuh ka bai-kali kumba la shim ha ka por ba pynjari ïa ka khangdam.
U Kynjatshai u la ïoh ban ïakren ïa ki nongleit nongwan, ki nongñiah kali kamai ha ka 28 tarik Lber ban kylli pyrthew hato kine ki nongñiah kali kamai ki la shim ïa ka bai-kali kumba shim mynshwa shwa ka jingkhang dam bad bun kiba la kren bynñiaw da kaba ong, “Ni tip shuh phi, hanga hi shimet ki shim kumba ki ju shim man ka sngi.
Haba kylli naduh naei phi shong kali shaduh shaei bad katno ka bai-kali, ka longkmie ka la ong, “Nga shong kali naduh Nongthymmai bad nga hiar shaduh Khyndailad bad ki shim ka bai-kali kumba ki ju shim T.50. Ngam I ba kin pynduna kine ki nongñiah kali kamai hynrei ki shim kumba ki ju shim hi man ka sngi”.
Ha kawei pat, kata ha Khyndailad haduh Motphran ka bai-kali ba ki nongñiah kali kamai ki shim T.20 ha ka jaka ba kin shim kumba myshwa tang T.10.
Haba kylli katno ki shim mynshwa hashwa ka khlam Covid-19, Ka la ong, “Mynshwa bym pat don ka khlam Covid-19 ki shim T.20 tyngka marwei na Nongthymmai sha Khyndailad lane sha Motphran, ki thep ruh ïa ki briew saw ngut shadien bad wei shakhmat bad teng teng ki thep arngut hakhmat. Hynrei mynta wat hadien bym don shuh ka khlam Covid-19 ka bai-kali ka neh beit kumjuh.
Ha kaba ïadei bad ki nongñiah kali kamai bun kim pat tip ïa kane ka jingpynbna jong ka tnad Transport ba dei ban shim ïa ka bai-kali kumba mynshwa bad don pat kiba la tip hynrei kim kwah ban pynduna lane ban shim kumba shim mynshwa.
Haba kylli ïa ki katto katne ki nongñiah kali kamai (Taxi) halor ka jingpynbna ba la mih na ka tnad Transport halor ka bai-kali, ka jubab ba ïoh ka long, “Em ngim tip ei ei”.
Ka jingkylli hangne ka long la ka sorkar kan leh ei ei halor kane ka bai-kali ha kaba bun ki paidbah ki la ud bad wat hadien na ka liang ka tnad Transport ka la dep ban pynbna paidbah ruh hynrei kine ki nongñiah kali kamai ki dang shim beit ïa kajuh ka bai kali kaba ki shim naduh ka khlam Covid-19.
Shuh shuh ki katto katne ki paidbah ki la pynpaw, “Haba kumne shi kumne ka bai-kali kam hiar shuh wat hadien ba la dep ban pynbna ruh, kan myntoi aiu shuh ïa ngi, ngi ba hap ban mad ïa kane man ka sngi hynrei ym lah ban leh ei ei. Wat lada ka rem katno katno ngim banse ban kiew bad siew tang ban poi ha ki jaka ba dei ban poi. Kiwei pat ki la pynpaw, “Ka sorkar ka la dei ban leh ei ei halor kane ka bai-kali wat hadien ba ka la dep ban pynbna khnang ba ka bai-kali kan long salonsar ha ki liang baroh ym ban kiew ban hiar, khnang ba mangi ki paidbah ruh ngim shem jingeh”.
