MAWKYRWAT:
Ka seng ki samla pule jong ka Khasi Students Union (KSU) jong ka Lai Hima Zone lyngba ka jingïamynjur lang bad ki Sordar Shnong jong ka thaiñ Umdohlun, Wahkaji jong ka South West Khasi Hills District kiba hap hapoh jong ki Lai tylli ki Hima ka Hima Langrin, Nobosohphoh,bad jong ka Hima Nongstoiñ South West Khasi Hills District ha ka 14 tarik u Ïaïong ki la ïoh ban pynlong ka jingïamir jingmut ha Dorbar Hall ha shnong Umdohlun South West Khasi Hills District naka bynta ban ïa shim rai lang ban buddien ïa kaei ba kila dep ban pynsngew haka sorka jylla da kaba kila ïoh ruh ban ai daka Dorkhas ne ka Memorandum ha u Bah Hamlet Dohling ha kine ki snem bala dep mynba u dang bat kum u Minister jong ka Community and Rural Development jong ka jylla Meghalaya ba kila dawa ban ïoh noh la ka jong ka C&RD Block ha kine ki thaiñ Umdohlun ne Wahkaji.
Na ka liang ki nongïalam jong ka Seng bad ki Sordar hadien ba kila dep ban ïa shong pyrkhat kila ïoh ban pynshai ha ki lad pathai khubor ba naka liang jong ki kum ka Seng KSU ha ryngkat daka jingai mynsiem bad ïasynran lang da ki Sordar shnong ba ka Seng KSU lai Hima Zone ha kine ki snem bala dep kila ïoh ban ai ïa ka Dorkhas ne ka Memorandum ha u Bah Hamlet Dohling u ba dang long u Minister ba un peit halor kane ka bynta.
Namar kata naka liang jong ki kila ïa rai ba kin nang buddien shuh shuh halor kane ka jingdawa lyngba ka Joint Action Committee (JAC) jong ka seng KSU bad ki Nongsynshar shnong ne Sordar shnong ban pynurlong ïa ki jingdawa jong ki bad ruh kin nang pynlong shuh shuh ki jingïalang paidbah haduh ban ïoh noh la kajong ka C&RD Block ha kane ka thaiñ namar ba ha kine ki thaiñ kala long shisha kaba donkam ban don ka C&RD Block namar ba ki paidbah ki shem jingeh ban pyndep ïaki kam ki jongki ban leit shaduh Mawkyrwat bad Ranikor Block.
Ka jingeh ba ki paidbah ki ïakynduh ka logn namar ka jingjngai kaba ki hap ruh ban ïaid da ki kjat ban poi ha ophi jong ka C&RD Block Ranikor bad kane ka la long ka jingeh ïaki paidbah ban pyndep ïa shibun ki jingdonkam hakaba ïa dei bad ki kam ophis naka bynta ki riew shimet bad ruh ïa ki jingdonkam hapoh shnong poh thaw.
Katkum ka jingïathuh u Bah Dustarwell K.Lyngdoh Secretary jong ka KSU Lai Hima u la ong ba ki shnong kiba don ha kine ki thaiñ kin ym duna ne tam ïa ki 80 tylli ki shnong kumta kala biang bha ba kin ïoh noh la ka jong ka C&RD Block ha kane ka thaiñ.
Ha kane ka sngi kiba ai jing kren ki kynthup ïa u Bah Shemphang Nonglang president bad Bah Dustarwell K.Lyngdoh Secretary jong ka KSU Lai Hima Zone bad na u Bah Stalin Thongni u ba dei u Sordar shnong Pynden-Umjarain South West Khasi Hills District ha ka jingsakhi lang ki wei de ki dkhot jong ka seng bad ki Sordar shnong jong ka ne ka thaiñ.
