SHILLONG:
U Chief Secretary ka sorkar jylla u Bah D.P Wahlang u la ong ba ka sorkar jylla ka la ithuh haduh 32 tylli ki jaka, 20 tylli ha shilynter ha ka Wah Umkhrah bad 12 tylli ha ka Wah Umshyrpi ban buh da ka Sewage Treatment Plant (SWT) bad na ka liang ka sorkar ka la rai ban daiñ da ka kuna kat kiba bret bad pyntuid jakhlia ha kine ki Wah.
Ïa kane u la kren hadien ka jingïalang ba la pyllong ha Yojana Shillong ha ryngkat ka jingïadonlang u Myntri Rangbah ka jylla u Conrad K Sangma, u Symbud Myntri Rangbah ka jylla uba dei khmih ruh ïa ka tnad kam pynroi sor u Bah Sniawbhalang Dhar, ki khlieh nongsynshar shnong jong ki shnong bapher bapher, lem bad kiwei kiwei de.
U Bah D.P Wahlang u la ong ba ka Sorkar jylla kala aipor ruh 45 sngi ïa ki bor ba dei khmih ban shim ïa ki sienjam, bad pynshitom ïa kino kino ki tih marpoh khyndew ha Wah Umkhen, ka ban sa long ka tyllong um ba kongsan na ka bynta ka New Shillong Township.
U Bah D.P Wahlang u la ïathuh ruh ba katkum ka hukum ba la pynmih da ka National Green Tribunal (NGT) ka la mana ban pyntuid ïa ki um jakhlia sha ki wah.
U Bah D.P Wahlang u la ong ba kane ka jingïalang ka long kaba sngewtynnad ha kaba baroh ki la ïamynjur ban ïatreilang ban pynkhuid ïa kine ki wah kynthup ka Wah Umkhrah, Wah Umshyrpi bad ka Wah Umkhen. U la ong ba ka jingthmu kaba kongsan ban pynkhuid ïa kine ki wah kadei namar ba ka sorkar ka don ka jingthmu ban pynllong ka tyllong um, hadien habud na ka bynta ka New Shillong Township. U la bynrap ba katkum ka jingbthah ka NGT, ka sorkar jylla kan ïa ki STP lada ioh jaka bad lada kam ioh, kan pan ka jingtreilang na ki Dorbar Shnong bapher bapher ba kin ai jaka ha kaban buh ïa ki STP
Haba kylli halor ka jingkhang ban pyntuid ïa ki um bad jahkhlia sha ki wah, u Bah D.P Wahlang u la ïathuh ba ha ka 6 tarik u Ïaiong la pyllong ka jingïalang ba nyngkong halor kane ka mat, kumno ban weng ïa kane ka jingeh, kaba ktah ïa ka mariang bad dei tang ka jingïatreilang yn lah ban weng ïa kane ka jingeh.
Shuh shuh u Bah D.P Wahlang u la ïathuh ba naduh kane ka taiew ba la dep, la pynjari da kaba daiñ da ka kuna kaba heh bha, ïa kino kino kiba dang pynkheiñ ïa ki kyndon ba la buh. U la ïathuh, “Kino kino kiba pyntuid jakhlia sha ki wah bad lada don kino kino ki iing ki ba don ïa ki septic tank kiba sniew lane ki bym treikam, ki dei ban maramot hapoh ka 10 sngi bad lada kim leh kin sha daiñ kuna ba T. 500 sngi sngi tad haduh ba kin da khang ïa ki septic tank, tad haduh ba kin nym pyntuid shuh ïa ki jaboh sha kine ki wah”.
U Bah D P Wahlang u la pyntip ba T. 110 klur lah dep ban buh lypa ban pynlut ïa kane ka kam katkum ka jingbthah ka NGT naka bynta ban pynkhuid ïa ki shnong ki thaw ha sor Shillong.
