SHILLONG:
Hadien ka jingshah pynkhyllem noh ka Executive Committee (EC) ba la lamkhmat da ka United Democratic Party (UDP) ha Khasi Hills Autonomous District Council (KHADC), u President ka seng u Bah Metbah Lyngdoh u la ong ba ka seng kan dang ïai bteng ban ïatreilang bad ka sorkar ha ka jylla.
Haba kren sha ki lad pathai khubor, u Bah Metbah u la ong ba haduh mynta kam don kano kano ka jingïapyrkhat da kumwei pat ha kaba ïadei bad ka jingïatreilang bad ka sorkar jylla.
Haba kylli halor ka jingkren u Bah Titosstarwell Chyne ba ki paralok ki shet kylla, u Bah Metbah u la ong ba ha ka jingïapynbeit ba ka seng ka don naduh kaba sdang ha ka por ba thaw ïa ka EC, ka don ka jingïasngewthuh jingmut ki MDC bad ki seng, hynrei ka jingwanrah ïa ka No Confidence Motion ka la pynlyngngoh ïa ka seng namar kam don jingtip eiei.
U la ong ruh ba ka seng kan ïeh ha ki MDC ba kin shim ïa kano kano ka rai namar kane ka dei ka kam jong ka District Council. U la bynrap ruh ba ha ka jingïatreikam, ka lah ban don ka jingduna hangne hangtai hynrei u la ong ba kam bha ban shu pynkhyllem man ka sngi ïa ka EC, hynrei ka donkam ïa ka jingïakren bad ka jingïasngewthuh jingmut.
