SHILLONG:
U Myntri ka sorkar jylla, u Bah Paul Lyngdoh, ha ka 10 tarik Jymmang u la ong ba ka sorkar kan sa ïakren bad ka Border Security Force (BSF) halor ka bailut ksan na bynta ki khun ki pateng jong u Bah Roning Nongkynrih u ba la shah siat ïap ha ki shipai ha ka 5 tarik Jymmang.
Haba kren sha ki lad pathai khubor, u myntri u la ong ba ka lad ban pynbiang ïa kane yn sa leh da ka sorkar bad ki shipai BSF.
Haba kylli la yn aiti ïa ki shipai sha ki pulit ka jylla, u Bah Paul u la ong, “Shisien ba la shah kem, ka jingtohkit na ka liang ki shipai BSF ki la sdang bad kiwei pat ki jingpynbiang pynbit kan long katkum ka aiñ”.
Haba kam ba ka la don ka jingpyn kheiñ ïa ka Standard Operating Protocol (SOPs), u myntri u la ïathuh ba la khmih ruh ïa kiwei pat ki bynta kum ka jingphah ïa ki BSF sha kiwei pat ki jaka.
“Balei ki don ha ki jaka riew paidbah haba ki dei ban don ha ki khappud jong ka Ri,” la buh jingkylli u Bah Paul.
Shuh shuh u la ong kaba kongsan tam ïa ka kam ki BSF ka long ban ïada ïa ka Ri ha ki jaka khappud na kino kino ki kam sniew kum ka jingpynrung tuh, ka jingkhaïi beaiñ bad mynta ka sorkar kan ban jur ba ki shipai BSF ki dei ban kynriah noh sha ki jaka khappud.
