SHILLONG:
Ka Myntri ka koit ka khiah, ka Kong Ampareen Lyngdoh ka la khot sngewbha ïa ka Meghalaya Accredited Social Health Activist Workers Union (MASHAWU) ha ka 22 tarik, Naiwieng na ka bynta ban ïakren halor ki jingdawa jong ki.
“…katei ka Myntri ba dei peit ïa ka tnad ka koit ka khiah bad ka imlang ka sahlang ka la khot ban pynlong da ka jingïalang bad ki nongtrei jong ka ophis jong ka MASHAWU ha ka 22 tarik, Naiwieng hapoh ka ophis treikam jong ka, ha kaba ïadei bad katei ka mat jong ka jingsangeh treikam jong ki nongtrei ASHA,” katkum ka shithi ba la pynmih da katei ka tnad sha ka Union ha ka sngi nyngkong.
Kane ka la jia hadien ba ki nongtrei ASHA ki la rai ban sangeh ka jingtreikam jong ki da kaba pynlong da ka jingïakhih ban ïaid paidbah shaduh Secretariat ha ka 27 tarik, Naiwieng, pyrshah ïa ka jingsngap man man ka sorkar jylla ïa ki jingdawa jong ki ban siew haduh T. 5,000. La pynlong ruh da ka jingïaid paidbah ha ka sngi thohdieng bad la ïashim bynta da ki spah ngut ki nongtrei ASHA.
“Ngi la rai ban pynlong da ka jingïakhih ban ïaid paidbah bad ban pynlong da ka jingshong kyllaiñ myngor hakhmat ka ophis secretariat,” ong ka President jong ka Union, ka Marajune Myrsing.
Ka Myrsing ka la ong ruh ba yn nym don ka jingsangeh bad nym pyndem lada ka sorkar jylla kam sngap bad kam pynshai halor kine ki mat jong ki ASHA.
Ki nongtrei ASHA ki la dawa na ka sorkar jylla ban pynnkiew ïa ka tulop jong ki na ka T. 2,000 shaduh T. 5,000. Katba ki jaka ai jingsumar ha ki 7,000 tylli ki shnong, ki la shah ktah ha katei ka jingïakhih jong ka indefinite strike da ki nongtrei ASHA ha kine ki ar taïew ba la dep.
