SHILLONG:
U Myntri Rangbah u Conrad K Sangma, ha ka 28 tarik Jylliew u la ong ba ka Don Bosco Technical School kan dei ka nongïatreilang kaba biang eh na ka bynta ka sorkar Meghalaya ban kyrshan bad pyndap iwei ïa iwei pat ha kaba ïadei bad ka jingthaw ïa ki kam ki jam.
U Sangma u la ong ïa kane haba leit jngoh ïa ka Don Bosco Technical School ha Shillong, ha kaba u la sam ruh ïa ki certificate bad ki shithi thungkam sha ki khynnah pule ba la pyndep ïa ka jingpule.
U la ong ruh ba ka sorkar ka don ïa ka thong ban thaw san lak ki lad ai kam ha ki tnad bapher bapher bad u la pynthikna ruh ba ka sorkar kan ïatreilang bad ka Don Bosco Technical School ha ka bynta kaba kham ïar khnang ban poi sha kane ka thong.
Haba ïakren bad ki khynnah pule kane ka skul, u Sangma u la ong, “Ki samla ki dei ka bor kaba khraw jong ka jylla bad ka Ri hynrei ka don ka jingeh kumno ban pyndonkam ïa ki samla ha ka rukom kaba seisoh.”
U la ong ruh ba ha ki katto katne snem ba la leit, ka sorkar ka la pyrshang ban wanrah da ka lynti katkum ka saïan kumno ban ithuh ïa ki skill kiba donkam kiban ïarap ha kaban kyntiew ïa ka ïoh ka kot jong ka jylla bad ban pynneh ïa ka na ka bynta ka lawei.
Haba ïaroh ïa ka Don Bosco Technical School, u Myntri Rangbah u la ong, “Ki khynnah pule kiba la pyndep ïa ka jingpule na kane ka technical school ki kham bun ban ïa kiwei kiwei ha ka jylla bad nga ai khublei ïa ka Don Bosco Technical School na ka bynta ka kam kaba bha kaba ka leh.”
U Sangma u la kyntu ruh ïa ka technical school ban kyntiew bad ban kynthup ha ki course jong ki khnang ban pynïahap bad ka jingkylla ka por bad ka teknoloji.
U Myntri Rangbah u la don ruh ka jingïakren bad ki khynnah pule bad u la jubab ïa ki katto katne ki jingkylli halor ki skill, ka ïoh kam ïoh jam, bad ki polisi jong ka sorkar jylla na ka bynta ki samla.
