SHILLONG :
Katkum ka jingpyllait jingtip jong ka tnat Meteorological Centre kaba don ha nongbah Shillong, Ka jinglong ka suiñbneng bad ka jingmaham na ka bynta ka jylla Meghalaya ka paw ba mynta ka sngi kata ka 24 Risaw 2022 kan don ka jinghap slap bad jur slap ha kiba bun ki jaka bad ka jinghap slap kan jur bha ha ka lam Mihngi ka jylla ( Khasi-Jaintia Hill districts) bad kumjuh ruh ha ki katto katne ki jaka jong ka Garo Hill districts.
Ha ka 25 Risaw 2022 kan don ka jinghap slap bad ka jingjur slap ha ka lam mihngi ka jylla ba kynthup ha Khasi-Jaintia bad Garo Hills District. Bad ha ka 26.10.2022 kan don ka jinghap slap kaba malu mala bad shu pdeng ha ki katto katne ki jaka.
Ka jingbeh ka lyer ka lah ban kot kumba 45- 55 kilometre ha ka shikynta bad lah ruh ban kot sha ka 65 kilo metre ha ka shikynta ha ka lam shathie jong ka jylla bad ki jaka ba marjan jong ka lam mihngi ka Meghalaya haduh ka por janmiet bad nangduna katba nangïaid ki por.
Ka jingshah ktah kiba lah ban mih na ka daw ka jingjur slap ha ka 24 bad 25 tarik u Risaw 2022,ha distrik jong ka East Jaintia hills, East Khasi Hills, West Jaintia Hills, South-West Khasi Hills, South Garo Hills ki long :
Ka jingduna halor ka jinglah ban ïohi shai na ka daw ka jinghap slap bad wan u lput
Ka jingthut ha ka jingïaid ki kali na ka jingdap um ha ki surok, ka jinglah ban khyllem ki dieng, ka jingkheiñ ki tnat dieng.
Ka jingshah ktah ki jingthung jingtep
Ka jingjulor ki jingthung kiba la dei kip or kheit por ot
Ka jingdap um ha ki jaka them
Ka jinglah ban shlei um ha ki wah, ki jaka ba madan
Ka lah ruh ban don ka jingtwa, syntuid ka khyndew
Ka jingshah pynjulor ki surok ba ym pat siang rong
Ka jinglah ban twa ne khyllem ki jingtei kiba ym pat da skhem na ka daw ka jingjur ka lyer bad jingjur ka jinghap slap
Ki jingbthah :
Ka jingbud ki jingbthah jong ka sorkar
Kiar ban leit sha ki jaka ba sakhi ka jingdap um man la ka por
Kiar ban shong ne sah ha ki ïing ne ki jingtei ba synjor
Donkam ban pyllait lynti ka jingtuid um ha ki jaka rep
Ka jingtap ne ker sawdong ïa ki jingthung
Donkam ban rieh haba pom pyrthat
Kiar naka jingïaid na ki wah, namar ka jingjur slap ka lah ban wallam ka jingwan kynsan ka umsaw
Long kiba husiar lad don ha ki jaka baduh ha ki jaka them
Ka jingkhie ka erïong “SITRANG” ha ka jingkynnoh “Si-Trang” ha ka lam shatei sepngi bad ki jaka ba marjan jong ka Bay of Bengal ka dei kaba la kynriah ha ka lam shatei – bad shatei mihngi ha ka jingstet kaba long 31 kilometre ha ka shikynta ha kine ki 6 kynta ba la dep bad ha ka por 11 shiteng ha kine kijuh ki thaiñ mynta ka sngi ka 24 tarik u Risaw hajan u latitude 19.30N bad longitude 89.50E, kumba 300 kilometre ka lam shathie bad shathie mihngi jong ka Sagar Island bad 390 kilo metre ka lam shathie bad shathie sepngi jong ka Barisal (Bangladesh).
Kane ka erïong ka lah ban bteng ha ka lam shatei bad shatei mihngi bad nangjur ha kine ki hynriew kynta ban wan. Bad ha kane ka jingïaid lynti ha ka lam shatei bad shatei mihngi, kane ka erïong kan ïaid lyngba ki rudnong ka Bangladesh hapdeng ka Tinkona Island bad ka Sandwip marjan bad ka Barisal ha ka 25 tarik u Risaw.